ویانا ییغینیده احمد مسعود شامل طالبان مخالف‌لری، بیرلشگن ملتلر تشکیلاتیدن افغانستان ده «آزادلیک و دموکراسی تأمین‌لنیشی» اوچون عملی اقداملر قیلیشی نی سۉره‌شگن.
اوشبو ییغین نینگ سۉنگی بیانیه‌سیده، بیرلشگن ملتلر تشکیلاتی طالبان بیلن یخشی علاقه گه اوتیشی اوچون بو گروه سیاست‌لری نینگ اۉزگریشی سۉره‌لگن.
«ویانا ییغینی نینگ سۉنگی بیانیه‌سینی» افغانستان ملی مقاومت جبهه‌سی نینگ تشقی علاقه‌لر مسئولی میثم نظری، تۉرت ساعت آلدین اکس صحیفه‌سیده نشر اېتگن.
مذکور بیانیه ده افغانستان وضعیتی اۉزگریشی اوچون «بیرلشگن ملتلر تشکیلانی نینگ اساسی نقشی» اوستیگه اۉرغوله‌نیب و یازیلگن که: «اوشبو ییغین اشتراکچی‌لری بیرلشگن ملتلر تشکیلاتیدن افغانستان ده آزدالیک، تینچلیک، برقرارلیک، دموکراسی، انسان حقلری و قانون حاکمیتی تأمین اېتیلیشی شونینگدېک، انسانی یاردملر عادلانه بیر شکلده ترقه‌لیشی اوچون عملی اقداملر قیلیشی نی سۉره‌یمیز.»
بونگه علاوه، اولر بیرلشگن ملتلر تشکیلاتیدن افغانستان ده «سیاسی قیینچلیکلر حل اېتیلیشی و مشروع دولت‌دارلیک» نی بیرینچی ایشلریدن قرار بېریلیشی نی سۉره‌شگن.
بوگون یکونلنگن اوشبو اوچ کونلیک ویانا ییغینیده، افغانستان 29 حزب و سیاسی حرکتلری نینگ رهبرلری و نماینده‌لری، امریکا، بریتانیا، اتریش، آلمان، اسپانیا، نارویژ اۉلکه‌لری نینگ دیپلومات‌لری شامل قطار مملکتلر نماینده‌لری و شونینگدېک ایران نینگ مصلحتچیسی حضور تاپگن اېدی.
افغانستان طالبان نظارتی گه اۉتگنیدن کیین، بو ویانا ده یۉلگه قوییلگن طالبان مخالف‌لری نینگ اوچینچی ییغینی دیر. ویانا ده یۉلگه قوییلگن طالبان مخالف‌لری نینگ اوچینچی ییغینی نینگ اصلی آماجی افغانستان کیله‌جگی اوچون «یۉل خریطه‌سی چیزیش» دیېلگن.
