بوکون اېرته‌لب افغانستان قۉشنی‌سی پاکستان مملکتیده سیلاو باشلنگن و بو مملکت اهالیسی بوکون (پنجشنبه، ۸ – فبروری) کیله‌سی حکومت‌لرینی سیلَش اوچون سیلاوگه قتنه‌شیب، آواز بېرماقده‌لر.
بو سیلاو خصوصیده قنچه‌لیک بیله‌میز و بو جریان آرقه‌لی پاکستان‌ده بیر دورلیک حاکمیت قنده‌ی تشکیل اېتیله‌دی؟
پاکستان‌نینگ سیلاوی خصوصیده بیلیش اوچون بیرینچی‌ده بو مملکت‌نینگ سیاسی تیزیمی توغریسیده بیر آز بیلیشی‌میز کېره‌ک.
آسیا جنوبیده جایله‌شگن و ۲۴۰ میلیون‌دن آرتیق جمعیتی بیلن، دنیا بۉیلب اېنگ کۉپ جمعیت‌لی اولکه‌لردن بیری بۉلمیش پاکستان مملکتی «جمهوری فدرال» تامانیدن باشقریله‌دی و بو مملکت‌نینگ ییریک مقام‌لری جمهور باشلیغ و باش وزیر دیر.
بیراق کۉپینچه سیاسی اجرایی قدرت بو مملکت باش وزیری‌نینگ قۉلی‌گه دیر و جمهور باشلیغ‌نینگ اۉرینی کۉپینچه بولیم‌لر اینیقسه سیاسی بولیم‌گه سمبولیک دیر.
پاکستان‌ده باش وزیر اېنگ یوقاری مرتبه‌لی مقام دیر و کۉپینچه تعیینات‌لر بو کیشی تامانیدن صورت تاپه‌دی، اینیقسه وزیرلر تعیین‌لنیشی.
بیراق پاکستان‌نینگ قاضی‌لری و قضاییه اعضالری کۉپینچه جمهور باشلیغ تامانیدن تعیین اېتیله‌دی.
پاکستان‌نینگ اېنگ تاثیرچن ارگانی حربی کوچلر باش قومندانی اېسه، باش وزیر تامانیدن تکلیف اېتیله‌دی و جمهور باشلیغ تامانیدن تصدیق اېتیلیب کېین تعیین‌لنه‌دی.
پاکستان سیلاو جریانی
اَیتیب اۉتدیک، پاکستان مملکتی‌نینگ سیاسی تیزیمی «جمهوری فدرال» دیر و (پاکستان اسلامی جمهوریتی) دېب تانیله‌دی.
بو مملکت تۉرت ایالت‌دن تشکیل اېتیلگن بو ایالت‌لر (پنجاب، سند، خیبرپختوانخواه و بلوچستان) دیر.
بو ایالت‌لرنینگ هر بیری‌نی اۉزیگه خاص محلی حکومتی بار و بو حکومت وزیر اعلی تامانیدن باشقریله‌دی و ایالتی حکومت رهبرلیگی هم ایالتی پارلمان تامانیدن تعیین‌لنه‌دی.
دیمک پاکستان‌ده بوکون پنجشنبه، ۸ – فبروری اۉتکزیله‌یاتکن سیلاوده بو مملکت‌نینگ پارلمانی اوچون ۲۶۶ وکیل یانیده، مذکور تۉرت ایالت قانون‌گذارلیک کېنگش‌لری اوچون هم وکیل‌لر سیلَنه‌دی.
پاکستان‌نینگ اوشبو دورده‌گی سیلاوی بو مملکت‌نینگ ۷۶ ییل‌لیک عمریده، اۉن ایکینچی دور سیلاوی دیر و اونگه ۱۲۷ میلیون‌دن آرتیق سیلاوچی قتنه‌شیشی اَیتیلگن.
پاکستان سیلاوی «بیرینچی سیله‌ش» تیزیمی اساسیده بۉلیب اۉته‌دی، یعنی بو سیلاوده اېنگ کۉپ ایشانچ آوازنی قۉلگه کیلتیرگن نامزد پیروز اعلان بۉله‌دی.
بو سیلاو آرقه‌لی تنلنگن پاکستان‌نینگ ملی مجلس‌لری «ملی کېنگش و سنا کېنگشی» اعضالری بیرگه‌لیکده بو مملکت باش وزیری و شونینگدېک جمهور باشلیغی‌نی تعیین‌له‌یدی و بو ایکی ییریک مقام اېسه قالگن کابینه اعضالرینی تعیین‌له‌یدی و شو بیلن پاکستان‌ده بیر دوره‌لیک حکومت تشکیل تاپه‌دی.
ایتیش کېره‌ک‌که، پاکستان‌نینگ بو دورده‌گی سیلاویده بو مملکت بۉیلب، ۵۱۲۱ نامزد اشتراک اېتگن و بو نامزدلرنی بعضی‌سی سیاسی حزب‌لرگه تېگیشلی و ایریمی اېسه مستقل شکلده قتنه‌شگن.
پاکستان‌نینگ سیاسی، اقتصادی و خوفسیزلیک وضعیتی
پاکستان‌ده سیلاو یۉلگه قوییلگن بیرحالده، بو مملکت حاضر جدی سیاسی، اقتصادی و خوفسیزلیک قیینچیلیک‌لر بیلن یوزمه‌یوز دیر.
پاکستان‌نینگ ییریک حزب‌لریدن بیری بۉلمیش و بوندن ایلگری حاکمیت‌گه اېگه بۉلگن، «تحریک انصاف» حزبی حاضر تحریم آستیده دیر، بو حزب رهبری و عین حالده، پاکستان سابق باش وزیری عمران خان دولتی سِرلرنی آشکار اېتیش، مالی فساد و نااسلامی نکاح‌گه عیب‌لنیب، اوچ مراتبه ۱۰ ییل، ۱۴ ییل و ۷ ییل قماققه محکوم اېتیلگن.
حاضر بو حزب‌نینگ سیلاوگه قتنه‌شیش حقی یۉق و اونینگ نامزدلری اېسه مستقل حالده سیلاوگه اشتراک اېته‌دیلر.
دیمک پاکستان سیلاویده کۉپراق باشقه ایکی حزب، نوازشریف رهبرلیگیده‌گی «مسلم لیگ» حزبی و پاکستان سابق تشقی ایشلر وزیری رهبرلیگیده بۉلگن «پاکستان خلقی» حزبی رقابت قیلیشه‌دی.
پاکستان حاضر جدی اقتصادی و خوفسیزلیک قیینچیلیک‌لر بیلن یوزمه‌یوز دیر و اۉتکن کون بو مملکت‌ده ایکی پارتلش هم یوز بېردی. شونینگدېک پاکستان اخیرگی بیر نیچه آی جریانیده جدی ناتینچ‌لیک‌لر و قورالی عصیانچی گروه‌لرنینگ فعالیتی‌گه گواه بۉلگن.
بونگه قۉشیمچه، پاکستان حاضر اقتصادی کورینیشدن هم قانیقرلی وضعیت‌گه قرار تاپمه‌گن و بو خصوصده کۉپ قیینچلیکلر بیلن یوزمه‌یوز و بونی حلی اوچون پاکستان حکومتی کمیده اۉتکن ایکی ییل جریانیده باشقه مملکت‌لر و تشکیلات‌لر جمله‌دن چین و خلق‌ارا بانکیدن قرض ایسته‌گن.
ایتیش کېره‌ک که پاکستان بوتون عمری‌گه هیچ قچان دواملی سیاسی برقرارلیککه قول تاپمه‌گن و هردایم حاکمیت‌لر بو مملکت‌ده کودتالر و قرشی‌لیکلرگه روپه‌ره بۉلیب و نهایتده سقوط قیلگن.
بونگه مثال عمران خان‌نینگ قدرت‌دن برطرف اېتیلیب و حبس‌گه آتیلیشی‌گه اشاره قیلیشی‌میز ممکن. عین حالده، پاکستان‌نینگ مسلم لیگ حزبی رهبری نوازشریف هم بیر دور تبعیددن قه‌یتیب، سیلاوگه قتنشماقده.
