تورکیه نینگ قونیه شهریده، طنطنلی بیر ییغین اۉتکزیلیشی آرقه‌لی، شعریت ملکی نینگ سلطانی حضرت امیر الکلام میرعلیشیر نوایی و بابری‌لر سلاله‌سی نینگ اساسچیسی ظهیرالدین محمد بابر توغیلگن کونلری نشانلندی.
دوستم بنیادی تشبثی بیلن اۉتکزیلگن اوشبو ییغین‌ده، قطار فرهنگی فعاللر و افغانستان سابق سیاسی سیمالری اشتراک قیلگن.
ییغین‌ده بابر و نوایی نینگ بویوک شخصیتلریدن ایسله‌نیب، بو ایکی اولوغوار شخصیت میراثی رواجلنیشی حقیده تاکید اېتیلدی.
افغانستان سابق سناکېنگشی نینگ کاتبی حاجی راحله دوستم نینگ بو حقده ایتیشیچه “نوایی و بابر حضرتلری تاریخ‌میزنینگ ایکی پارلاق یولدوزی دیر، نوایی و بابرشاه ادبیات، دولت‌چیلیک و اداره‌چیلیک نینگ سیماسی دیر، نوایی و بابر نینگ اثرلری تیلی‌میزنینگ بایلیگی و بارلیگی دیر. بوگون بیزلر تیلی‌میزگه اعتبار بېرمه‌گنلر بیلسین‌لر که بیزنینگ تیلی‌میز تورک تیلی و یورت‌میز تورکستان دیر”
شونینگدېک احتفالده نطق سۉزله‌گن باشقه اشتراکچیلر و فعاللر هم، نوایی و بابر حضرتلری نینگ بشریت تاریخی اوچون بجرگن اونملی ایش‌لریدن فخر بیلن یاد اېتکن.
ایتیش کېره‌ک که بابر و نوایی نینگ توغیلگن کونلری، اۉزبېکلر تامانیدن خاص کون اوله‌راق نشان‌لنه‌دی.
