پاکستان باش وزیر اۉرینباسری و تشقی ایشلر وزیری محمداسحاقدارنینگ معلوم قیلیشیچه، اسلام آباددهگی «سرینا مهمانخانهسی» اطرافیده و «قیزیل حدود»ده جاري اېتیلگن ترانسپورت چېکلاولری ۷-ثور دوشنبه کونی توگهتیلهدی.
بو چېکلاولر اۉتگن هفتهنینگ باشیدن بېری ایران و امریکا اۉرتهسیدهگی مذاکرهلرنینگ ایکّینچی باسقیچی اۉتکزیلیشی احتمالی سببلی جاري اېتیلگن اېدی.
پاکستان تشقی ایشلر وزیری ایکس اجتماعی ترماغیده یازگن پُستیده، بو دورده صبر-طاقت کۉرستگن پاکستان خلقیگه، خصوصاً اسلام آباد و راولپیندی اهالیسیگه منّتدارچیلیک بیلدیردی.
اونینگ سۉزلریگه کۉره: «سیزنینگ قۉللب-قوّتلشینگیز بیزگه مهمانلریمیز خوفسیزلیگینی تأمینلش و منطقهده تینچلیک اوچون سعی-حرکتلریمیزنی دوام اېتتیریش امکانینی بېرهدی. بیز بو مقصدلرگه صادقمیز و دعالرینگیز همده یخشی تیلکلرینگیز اوچون منّتدارمیز، اولرگه محتاجمیز.»
پاکستان اۉتگن هفتهنینگ باشیدن بېری ایران و امریکا اۉرتهسیدهگی احتمالي مذاکرهلر سببلی اسلام آباد و راولپیندیده جماعت ترانسپورتی حرکتینی وقتینچه تۉختهتگن اېدی.
پاکستان یېتکرمهلرینینگ خبر بېریشیچه، اوشبو شهرلرده خوفسیزلیکنی تأمینلش اوچون۱۰ مینگدن آرتیق خوفسیزلیک خادمی جایلشتیریلگن و تورلی نظارت پونکتلری اۉرنهتیلگن.
بیراق، کوچهیتیریلگن چارهلرگه قرهمهی، ایران و امریکا اۉرتهسیدهگی ایکّینچی باسقیچ مذاکرهلر اۉتکزیلمهدی. ایران امریکا تامانیدن دوام اېتتیریلهیاتگن دېنگیز قملی سببلی مذاکرهلرده اشتراک اېتیشدن باش تارتگن.
شونگه قرهمهی، ایران تشقی ایشلر وزیری عباس عراقچی سۉنگّی اوچ کون ایچیده ایکّی مرته اسلام آبادگه تشریف بویوریب، پاکستان رسميلری بیلن اوروشنی توگهتیش و امریکا بیلن مذاکرهلر مسألهسینی محاکمه قیلگن.
