طالبلر ایچکی ایشلر وزیری سراجالدین حقانی چیننینگ کابلدهگی اېلچیسی جاو شینگ بیلن اوچرهشیب، ایکّی تامانلهمه مناسبتلرنی رواجلنتیریش مسألهلرینی بحث قیلیشگن.
طالبلر ایچکی ایشلر وزیرلیگی سۉزلاوچیسی عبدالمتین قانع ایکسده نشر قیلگن بیاناتیده اوشبو اوچرهشوو حقیده معلوم قیلگن.
اونگه کۉره، سراجالدین حقانی اوشبو اوچرهشووده چیننینگ منطقوي معمالرنی حل اېتیشدهگی سعی-حرکتلرینی تیلگه آلیب، افغانستان برقرارلیککه اینتیلهیاتگنینی و خلق فراوانلیگی همده معمالرنی حل قیلیشگه اعتبار قرهتهیاتگنینی تأکیدلهگن.
سۉنگّی ییللرده طالبلر و چین اۉرتهسیده سیاسي و اقتصادي علاقهلر سېزیلرلی درجهده کېنگهیگن. چین بوندن آلدین اورومچی شهریده طالبلر و پاکستان اۉرتهسیده بیر هفتهلیک مذاکرهلرگه هم مېزبانلیک قیلگن و واسطهچیلیک قیلگن اېدی.
مذکور مذاکرهلرده تامانلر کېسکینلیکنی کوچهیتیرهدیگن حرکتلردن تيیلیش بۉییچه کېلیشووگه اېریشگن بۉلسه-ده، اوندن کېین هم افغانستان-پاکستان چېگرهسیده بیر نېچه بار تۉقنهشوولر، شونینگدېک پاکستان تامانیدن چېگره ولایتلریگه هجوملر قید اېتیلگن.
