بدخشان ولایتی سۉنگی وقتلرده، طالباننینگ ایچکی قرهمه-قرشیلیکلری، بو حاکمیتدهگی قومی حاکمیتنی مستحکملش و نهایتده ثروت و قدرت اوچون تهلشیش میدانیگه اَیلنگن.
بدخشان ولایتیدن ایشانچلی منبعلرنینگ معلوماتیگه کۉره، بو ولایتده کمیده اخیرگی بیر آی ایچیده طالباننینگ حربی حرکتلری جدّیلشگن و بو اېسه آلتین یا -ده طلا کانی اوستیدهگی جنجللر عاقبتیده یوزهگه کېلگن.
حاضرگی کونلرده اساسی جنجل طالبان و بو گروهنینگ ناراض بۉلگنی ایتیلگن بدخشانلیک قومندانی جمعه خان فاتح اۉرتهسیده دیر که منبعلرگه کۉره، فاتح طالبان مرکزی حاکمیتی بیلن قرشی تورگنیدن سۉنگ، اۉزینینگ توغیلگن جایی نسی اولسواللیگیگه قیتیب کېلگن و شو جریانده طالبان اونینگ زابل ولایت اۉرینباسرلیگی لوازمیدن هم چېتلب قۉیگن.
بدخشانده، جمعه خان فاتح طالبان بیلن ضدیتی و طالباننینگ بو وضعیتنی باستیریش اوچون حربی حرکتلری دوام اېتر اېکن، اېندی بدخشانده طالبانگه قرشی حربی بیر جبهه آچیلهدیمی و بو بیلن طالبانگه قرشی کېنگ بیر اوروش باشلنیشی ممکنمی؟ دېگن سواللر اۉرتهگه کېلگن.
بدخشانده حربی کوچلر یوباریلیشی
اخیرگی کونلرده، کمیده بېش مراتبه منبعلر اۉزبېک تیوی بیلن شریک قیلگن معلوماتلریده طالبان حربی حرکتلری جدّیلشیب، بو گروه تامانیدن تۉپلم حالده حربی کوچلر بدخشاننینگ دروازها حدودیگه یوباریلماقدهلیگینی اَیتماقده.
منبعلرنینگ ایتیشیچه، بدخشانده طالبان بو ولایتدهگی کوچلرینی تورلی حدودلردن ییغیب دروازها تامان یوبارگنی قۉشیمچه، تخار، قندوز و بغلان ولایتلریدن هم حربی کوچلر بدخشاننینگ دروازها حدودی یقینلریگه یوباریب جایلشتیرگن.
شونینگدېک، منبعلر حتا که کابل تاماندن کېلگن و بدخشان تامان کېتهیاتگن طالبان حربیلری کاروانینی سالنگده هم کۉرگنینی اَیتگن. دېیرلی طالباننینگ بو حرکتلری بدخشانده حربی بیر تۉقنهشوو اوچون تیارگرلیک کۉرینهیاتگنینی بیلدیرهدی.
بدخشانده جنجللر سۉزلشوو بیلن حل اېتیلمهگنی
سۉنگّی هفتهلرده بدخشانده، جنجللر جدّیلشیشی آرتیدن طالباننینگ یوقاری مرتبهلی رسمیلری هم بدخشانگه باریب، بو وضعیتنی حل اېتیشگه حرکت قیلگن بیراق بو اینتیلیشلر حاضرگچه نتیجه بېرگن اېمس. حاضرگچه منبعلر معلوماتی اساسیده، طالبان مدافعه وزیری ملا یعقوب مجاهد، استخبارات باشلیغی عبدالحق وثیق، طالبان حربی کوچلری قومندانی فصیحالدین فطرت، اقتصاد وزیری دین محمدحنیف، ایچکی ایشلر وزیرلیگی اۉرین باسری و طالباننینگ تانیقلی قومندانلریدن ابراهیم صدر، طالبان رهبری بویروغلرینی تعقیب اېتووچی ادارهسی باشلیغی شمسالدین شریعتی، هلمندده طالبان والیسی امانالدین منصور و شونگه اۉخشش طالبان تورلی رسمیلری بدخشانگه سفر قیلگن بیراق بو سفرلر حاضرگچه نتیجهسیز قالگن.
منبعلرنینگ ایتیشیچه، طالبان بو رسمیلری بدخشان و جمعه فاتح ضدیتی خصوصیده بیر قنچه مجلسلر هم اۉتکزگن بیراق بو مجلسلر نتیجه بېرمهگن و جمعه خان فاتح بدخشان امنیه قومندانلیگی لوازمی یا -ده طالبان استخبارات ادارهسی ریاستلریدن بیرینی قبول قیلمهگن.
اساسی معما نیمه دیر؟ ثروت و قدرت اوچون تهلشیش
بدخشاندهگی ماجرا اساسا، بو ولایتده آلتین کانی اوستیدهگی جنجللردن باشلنگن. ایتیلیشیچه طالباننینگ رهبریگه علاقهدار شخصلر هلمند و قندهاردیک ولایتلردن کېلیب، بدخشان آلتین کانلرینی قزیب آلماقده دیر و بو اېسه بدخشانلیک طالبان قومندانلری، ناراضیلیگینی اۉرتهگه آلیب کېلدی.
شو بیلن بیرگه، بدخشانده طالباننینگ پشتون خلقیگه منسوب رسمیلری و عسکرلرینینگ قومی یاندهشووی هم جنجللرنینگ اساسی سببلریدن بیری دیر.
دېیرلی بدخشانده حاضر طالبان کانلرنی بیملال تالان-تاراج قیلیشی و قومی حاکمیتنی مستحکملش اوچون جدّی معماگه دوچ کېلگن.
طالبان اخیرگی کونلرده، جمعه خان فاتحگه عاید سېسلی کلیپلرنی ترقهتیش بیلن بدخشانده وضعیتنی نرمال کۉرسهتیشگه حرکت قیلهیاتگن بۉلسه-ده بیراق، منبعلر بدخشاندهگی حقیقی وضعیتنی ترنگلیکلر بیلن ایلگری کېتهیاتگنینی بیلدیرهدی. شو سبب بدخشانده احتمال بیر اوروش یوز بېریشی ممکنلیگی ایتیلماقده.
