نفت نرخلرینینگ کۉتریلیشی و هرمز بۉغازی قَیته آچیلیشی بارهسیدهگی خواطرلر کوچهییشی یانیده جهان بازاریده خام نفت نرخلری ینه کۉتریله باشلهدی.
رویترز خبریگه کۉره، بوگون (جمعه، ۱۶-اسد) گرینویچ وقتی بیلن ساعت۶:۳۰ حالتیگه کۉره، برنت مارکلی نفت نینگ نرخی 80 سنتگه آشیب، بیر بشکه اوچون 83،34 اقش دالریگه یېتگن.
خبرده ایتیلیشیچه، «وست تگزاس اینترمدیت» ) خام نفتی نرخی هم۵۲ سنتگه آشیب، بیر بشکه اوچون۷۷.۸۱ امریکا دالرینی تشکیل اېتگن.
جاري هفته باشیده نفت نرخلری پسهیگن اېدی، چونکه هرمز بۉغازینی قَیته آچیش و خلقارا سوو یۉلیدهگی قتناونی عادتي حالتگه قَیتریش بۉییچه کېلیشووگه اېریشیلیشی ممکنلیگی حقیده تخمینلر پیدا بۉلگن اېدی.
بیراق، رویترز معلوماتیگه کۉره، تامانلر اۉرتهسیدهگی کېلیشماوچیلیکلر هنوز سهقلنیب قالماقده. ایران و عمان هرمز بۉغازی آرقهلی امریکا و اسرایل کېمهلری نینگ اۉتیشینی تعقیقلشگه عاید رېجهنی بحث قیلماقده.
خبرگزارلیک نینگ یازیشیچه، ایران پارلمانی اعضالریدن بیری پارلمان کمیتهسی امریکا، اسرایل و دشمن دېب بهالنهدیگن باشقه دولتلر کېمهلری نینگ هرمز بۉغازیدن اۉتیشینی تعقیقلشگه دایر دستلبکی لایحهنی کۉریب چیقهیاتگنینی بیلدیرگن.
مذکور لایحهگه کۉره، قاعدهنی بوزگن کېمهلر یوک قیمتی نینگ۲۰ فایزیگچه مقداریده جریمهگه تارتیلیشی ممکن.
رویترز یوقاری مرتبهلی ایرانلیک عملدارگه تهیهنیب یازیشیچه، ایران هرمز بۉغازی آرقهلی اۉتهدیگن کېمهلردن یوک قیمتی نینگ ۷-۵فایزی مقداریده تۉلاو اوندیریشنی رېجهلشتیرماقده. عمان اېسه تخمیناً۳ فایز مقداریده تۉلاو جاري اېتیشنی کۉریب چیقماقده. واشنگتن اېسه عموماً هېچ قندهی تۉلاو آلینمسلیگینی طلب قیلماقده.
خبر گزارلیک کېمه قتناوی و انرژی ساحهسیدهگی تۉرت نفر منبعگه تهیهنیب، تکلیف اېتیلگن کېلیشوونی عملگه آشیریش آسان اېمسلیگینی قید اېتدی. بونگه امریکا چېکلاولری همده هر قندهی تۉلاولرگه عاید سوغورته چېکلاولری تۉسقینلیک قیلماقده.
اوشبو عامللر سببلی جاري هفته دوامیده نفت نرخلری کېسکین تېبرهنیب توردی و هفته آخریگه کېلیب، هرمز بۉغازینی قَیته آچیش مسألهسیدهگی کېلیشماوچیلیکلر سقلنیب قالهیاتگنی طفیلی ینه اۉسیش یۉلیگه قَیتدی.
