سعوديه عربستانی مدافعه وزیرلیگی و یمن نینگ خلقارا مقیاسده تن آلینگن حکومتینی قۉللب-قوّتلاوچی سعودي عربستان باشچیلیگیدهگی حربي (ائتلاف) مطبوعات سۉزلاوچیسی ترکی المالکی حوثيلر نینگ هجومی عاقبتیده 11 نفر تینچ اهالی یرهلنگنینی معلوم قیلدی.
رویترز خبریگه کۉره ترکی المالکی بوگون (جمعه، 16-اسد) تانگیده هجوم پنجشنبه کونی سعودي عربستان نینگ جَنوبیدهگی نجران ولایتیده صادر بۉلگنینی ایتدی.
اونینگ سۉزلریگه کۉره، یرهلنگنلر آرهسیده سعودي عربستاننینگ 7 وطنداشی، مصرنینگ 2 وطنداشی، یمن نینگ 1 وطنداشی و پاکستان نینگ 1 وطنداشی بار.
ترکی المالکی یرهدارلر آرهسیده ایکّینچی درجهلی کوییش آلگن تۉرت یاشلی باله هم بارلیگینی بیلدیردی.
او حوثيلرنی تینچ اهالی یشهیدیگن حدودلرنی ترتیبسیز اۉققه توتیش و خلقارا انسانپرورلیک حقوقنی بوزیشده عیبلب، (ائتلاف) تینچ اهالینی حمایه قیلیش اوچون برچه ضرور چارهلرنی کۉریشده دوام اېتیشینی تأکیدلهدی.
یمن حوثيلری حاضرچه سعودي مدافعه وزیرلیگی و سعودي باشچیلیگیدهگی (ائتلاف) وکیلی نینگ بو دعوالریگه مناسبت بیلدیرمهگن.
حوثيلر (ائتلاف) نینگ صنعا قۉنالغهسیگه اویوشتیرگن هجومیدن سۉنگ سعودي عربستان بیلن صلحنی بېکار قیلیب، مملکتدهگی نشانلرگه هجوملرنی قَیته باشلهگن اېدی.
ایران تامانیدن قۉللب-قوّتلنهدیگن اوشبو قوراللی گروه، شونینگدېک، سعودي عربستانگه قرشی دېنگیز قملینی اعلان قیلگن همده حاضرگچه قیزیل دېنگیزده سعوديهگه تېگیشلی سکّیزته نفت تانکرینی نشانگه آلگنینی دعوا قیلگن.
