افغانستان اسلامي خلق بیرلیگی حزبی رهبری محمد محقق، کابل غربیدهگی مکتبده یوز بېرگن پارتلش مناسبتی بیلن بو حادثه اوچون مسوولیت طالبان ذمّهسیده اېکنینی ایتدی.
محمد محقق بوگون اېرتهلب (سهشنبه،۲۷ اسد) بیانات بېریب، طالبان حاکمیتنی قۉلیده اوشلب تورگنی سببلی خلق نینگ جانی، مال-ملکی و شأنینی حمایه قیلیش اوچون مسوول اېکنینی تأکیدلهدی.
محمدمحقق شوندهی دېدی: «بو اَینچلی حادثه، اینیقسه، فقط کتابچه و قلم بیلن شغللنهدیگن بیر گروه یاش بالهلر آرهسیده صادر بۉلگنی، اونی صادر اېتگنلر نینگ شفقتسیزلیگی و رحمسیزلیگیدن دلالت بېرهدی. شبههسیز، حکمران گروه مملکت حدودینی تۉلیق نظارت قیلهیاتگنینی دعوا قیلگنی سببلی، بو فاجعهلی حادثه اوچون مسوولیت اولر نینگ ذمّهسیدهدیر. اولر اۉز نظارتیدهگی حدودده آدملر نینگ جانی، مال-ملکی و شأنینی حمایه قیلیشلری کېرهک اېدی.»
افغانستان اسلامي خلق بیرلیگی حزبی رهبری حادثه نینگ قندهی صادر بۉلگنی حقیده گپیریب، ایکّی موتر سیکل مکتب ایچیگه ایکّیته قۉل نارنجکنی اولاقتیرگنی حقیده معلومات آلگنینی ایتدی.
تیناوون (دوشنبه ۲۶ اسد) ساعت تخمیناً۴:۳۰ ده کابل شهری نینگ 18-خوفسیزلیک ناحیهسیگه قرهشلی دشت برچی حدودیدهگی مهديه شهرچهسیده جایلشگن «شمع هدایت» خصوصي مکتبی حویلیسیده پارتلش یوز بېردی.
محلي منبعلر هم حادثهدن کېینگی دستلبکی ساعتلرده شونگه اۉخشهش معلومات بېریب، بیر کیشی تشقریدن مکتب حویلیسیگه پارتلاوچی مادّهنی اولاقتیرگنینی ایتگن اېدی.
طالبلر حادثه یوز بېرگنینی تصدیقلهگن، بیراق قۉشیمچه تفصیلاتلر بېرمهگن. معلوماتلرگه کۉره، اوشبو حادثهده قریب۵۰ نفر اۉقووچی جراحتلنگن.
