افغانستان اسلامي جمعیتی حزبی بیر بیانات نشر قیلیب، طالبلر کوچلرینینگ کابلدهگی خاتم النبیین علمی حوزهسیگه باستیریب کیریشینی «دشمنانه» حرکت دېب اتهدی و قارهلهدی.
حزب اۉز بیاناتیده شوندهی دېدی: «طالبلرنینگ بو بارهدهگی دشمنانه حرکتی اسلامي قدریتلر و خبردارلیکنی کېنگهیتیریش یۉلیده فعالیت یوریتهیاتگن، مذهبلررا یقینلشوو و افغانستان خلقی اۉرتهسیدهگی بیردملیکنی تأمینلشگه خدمت قیلهیاتگن مؤسسه و مرکزلرگه نسبتاً دشمنلیکلرینینگ یقّال بېلگیسیدیر.»
افغانستان اسلامي جمعیتی حزبینینگ قۉشیمچه قیلیب، «بوندهی فتنهچی یاندشوو، شبههسیز، افغانستان خلقینینگ جدّي ناراضیلیگیگه دوچ کېلهدی»، دېیه تأکیدلهدی.
حزب بیاناتیده، شونینگدېک، «هزاره و شیعه جماعهسی مملکتنینگ فخرلی خلقلریدن بیریدیر» دېب یازیب، اولرنینگ همده باشقه فقرالرنینگ اجتماعي، سیاسي، اقتصادي، مدني و مېدیا ساحهلریده فعالیت یوریتیش بۉییچه تۉلیق حقوقلرینی قۉللب-قوّتلش و حمایه قیلیشینی تأکیدلهدی.
طالبلر عدلیه وزیرلیگیگه قرهشلی کوچلر شو هفته شنبه کونی کابلدهگی خاتم النبیین علمی حوزهسیگه باستیریب کیریب، اونی قورشهب آلگن. خبرلرگه کۉره، طالبلر حاضرده اوشبو علمی حوزهنی بۉشهتیب، مصادره قیلگن.
بوندن تشقری، طالبلر «شیعهلر و هزارهلرنینگ خلق بیلن علاقهلر ادارهسی»گه هم باستیریب کیریب، کمیده اوچ نفر هزاره و شیعه جماعهسینینگ نفوذلی وکیلینی حبسگه آلگن.
