بیرلشگن ملتلر تشکیلاتی باش کاتبینینگ مخصوص وکیلی، رباب فاطمه، قندهارگه ایکّی کونلیک سفریدن سۉنگ، افغانستان سیاسی جریانیده رواجلنیش کېلتیریلیشینی سۉرهب ایتیشیچه، بو جریاندهگی رواجلنیش اوشبو مملکتنینگ کۉپلب مسئله و قیینچیلیکلریگه یېچیم تاپیلیش اوچون زمینه یرهتیشی ممکن.
رباب فاطمه سفری یکونیده، بیرلشگن ملتلر تشکیلاتی افغانستان خلقیگه انسانپرورلیک یاردملرینی دوام اېتتیریش و یېتکزیب بېریشگه صادق اېکنینی تاکیدلب، عین حالده ساغلیقنی سقلش انقراضی، سوو تنقیصلیگی، اقلیم اۉزگریشی، انرژی انقراضی، خصوصی سکتورنی رواجلنتیریش و دیجیتال احتیاجلر ساحهسیده یېچیملر تاپیش اوچون حرکت قیلیب کېلهیاتگنینی بیلدیردی.
او اوشبو سفر دوامیده طالبان محلی رسمیلری، جمله دن قندهار والیسی اۉرینباسری و طالبان سۉزلاوچیسی بیلن اوچرهشدی. رباب فاطمه بو ییغینلرنی ایجابی بهالب، اولرده افغانستان آلدیده تورگن بیر قنچه مسئلهلر بۉییچه سۉز یوریتیلگنینی ایتدی.
بیرلشگن ملتلر تشکیلاتی باش کاتبینینگ مخصوص نمایندهسی شونینگدېک، مدنی جمعیت فعالی بۉلگن بیر قطار عیاللر بیلن هم اوچرهشیب، بو عیاللر عدالتخواهلیک ساحهسیده مهم فعالیتلر آلیب بارهیاتگنینی بیان قیلدی.
شونینگدېک او، سۉزلرینینگ باشقه بیر قسمیده مملکتگه قیتووچیلر وضعیتی توغریسیده گپلهشیب، اولرنی قۉللب-قوتلش دستوری کۉچهیتیریلیشی کېرهکلیگی و شاشلینچ انسانپرورلیک یاردملردن تشقری، اولرنینگ برقرار تیریکچیلیک امکانیتلرینی تامینلش اوچون هم یېچیملر کۉزده توتیلیشی ضرورلیگینی تاکیدلهدی.



