جمعه کونی 1 جدی آقچه اولوسواللیگیده اۉتکزیلگن اۉغلاق مسابقه‌سیده اونلرچه چاپندازلر آقچه، فیض آباد و خانقاه اولوسواللیکلریدن قتنه‌شیب، کوچ و مهارتلرینی نمایشگه قوییشدیلر.
مسابقه نتیجه‌سیده آقچه اولوسواللیگی نینگ چاپندازلری آخر اوغلاق‌نی آلیب بیرینچی و فیض آباد اولوسواللیگی نینگ چاپندازلری اېسه ایکینچی اۉرین نی قازانگنلر.
مسابقه جوزجان ولایتی سپورت اداره‌سی نینگ اۉغلاق فدراسیونی تمانیدن یۉلگه قوییلگن. مسابقه تماشاسیگه آقچه، فیض آباد، مردیان، خانقاه و مینگجیک اولوسواللیکلریگه قۉشیمچه مرکز شبرغان‌دن هم قیزیقوچیلر اشتراک اېتیشگنلر.
افغانستان و منطقه‌ده‌گی قوشنی اۉلکه‌لرده قیش فصلی اۉغلاق مسابقه‌لری موسومی حسابلنه‌دی. افغانستان نینگ شمال و شمالشرق ولایتلریده هر هفته سۉنگیده شونده‌ی بویوک مسابقه‌لر عملگه آشیریله‌دی.
سپورت اداره‌سی نینگ مسوللری بونده‌ی مسابقه‌لردن مقصد چاپندازلرنی ترغیب اېتیش و یېگیتلر آره‌سیده محلی سپورتلرنی رواجلنتریش دیب بهالیدیلر.
