طالبان ارگ‌ده تېگیشلی ایکس صحیفه‌سیده اعلام قیلیشیچه، افغانستان بۉییچه ترکیه اېلچیسی جنک اونال، طالبان باش‌وزیری نینگ سیاسی اۉرین‌باسری مولوی عبدالکبیر بیلن اوتکزگن اوچره‌شوویده، ترکیه حکومتی بو مملکت‌ده طالبان‌گه قرشی سیاسی و حربی فعالیت آلغه آلیب باریش اوچون، هیچ کیم‌گه رخصت بېرمسلیگی‌دن ایشانچ بېرگن.
ارگ صحیفه‌سیده ترقه‌تیلگن بیانات‌گه کېلیشیچه، مذکور اوچره‌شو‌وده طالبان باش وزیری نینگ اۉرین‌باسری ترکیه مملکتی‌نینگ طالبان‌گه قرشی هیچ قنده‌ی فعالیت‌گه رخصت بیرمسلیک قراری‌نی خوش قرشی‌لب، بو خصوصده ترکیه‌دن منت‌دارچیلیک بیلدیرگن.
ترکیه اېلچی‌لیگی حاضرگچه بو حقده هیچ قنده‌ی فکر بیلدیرمه‌گن.
شونینگدېک، میلادی ۲۰۲۱ – ییل آگست آیی، افغانستان‌ده کېلگن اۉزگریش و جمهوریت تیزیمی قوله‌گنی و طالبان قیته حاکمیت‌گه کېلگنی آرتیدن، افغانستان‌نینگ جمهوریت تیزیمی دوریده‌گی ییریک سیمالریدن قطاری ترکیه‌ده یشب کېلماقده.
طالبان‌نینگ تانیقلی مخالف‌لریدن بۉلمیش مارشال عبدالرشید دوستم و بونگه قۉشیمچه بیر قنچه طالبان مخالف‌لری حاضر ترکیه‌ده حیات کیچرماقده‌لر. اوشبو سیمالر طالبان‌گه قرشی «افغانستان‌نی قوتقیریش ملی مقاومتی» آستیده بیر کېنگش هم ایجاد قیلیشگن. مذکور کېنگش اېسه حاضرگچه بیر قنچه مراتبه اوتکزگن آنلاین ییغیلیش و بیانات‌لری آرقه‌لری، طالبان حکومتی‌نینگ تورلی بولیم‌لریده‌گی سیاستی‌نی قاره‌لش‌گه حرکت قیلگن.
اَیتیش کېره‌ک که، بوندن آلدین هم طالبان باش‌وزیری نینگ اقتصادی اۉرین‌باسری عبدالغنی برادر نینگ ترکیه‌ده بۉلگن سفری جریانیده، ترکیه تشقی ایشلر وزیری هاکان فیدان، اوشبو مملکت هیچ بیر حربی جریان و فعالیت‌نی قولب-قوتلمس‌لیگی‌نی بیلدیرگن اېدی.
