فاریاب محلی منبعلری، ایران‌ده اوشبو ولایت یشاوچی‌لریدن 7 ته‌سی ایکی اَیری حادثه‌ده جان بېرگن‌لریدن خبر بېریشگن.
منبع نینگ ایتیشیچه، فاریاب یشاوچی‌لریدن 5 ته‌سی ایران‌دن ترکیه تامان کېتیش پیت، چېگره کوچلری تامانیدن آتیب اۉلدیریلگن. اوشبو حادثه کمیده بیر آی آلدین یوزبېرگن اېکن و اوشبو ییگیت‌لرنینگ جسدلری قار آستیده قالیب و ینگی‌لیکده تاپیلگن.
منبع‌گه کۉره، مذکور حادثه‌ده جان بېرگن‌لردن بیری خواجه سبزپوش اولوسواللیگی‌نینگ بایقیزی قیشلاغی یشاوچیسی، حاجی‌مراد ناملی بیر ییگیت دیر که او بیر آی‌دن بویان درک‌سیز یوقالگن اېکن، بیراق او ایران‌دن ترکیه تامان کېتیش پیت، چېگره حربی‌لری تامانیدن آتیب اۉلدیریلگنی معلوم قیلینگن.
اوشبو حادثه‌ده جان بېرگن باشقه تۉرت ییگیت‌نینگ کیم‌لیگی، حاضرگچه انیق‌لنمه‌گن. بیراق ایتیلیشیچه، اولردن ایکی ته‌سی دولت‌آباد اولوسواللیگی و باشقه ایکی ته‌سی اېسه خواجه سبزپوش اولوسواللیگی یشاوچیلری دیر.
عین حالده منبع‌نینگ کۉپه‌یتیریشیچه، ایکینچی حادثه‌ده اۉتکن آقشام (29- جدی) ساعت 8 اطرافیده بصیراحمد و عزیزالله ناملی باشقه ایکی ییگیت ایران‌نینگ تالقان شهریده، موزلنگن بیر حوض‌گه توشیب کېتیشی باعث جان بېرگن. اوشبو ایکی ییگیت اېسه حوض‌گه توشیب کېتگن بیر اِیت‌نی قوتقریش پیت، اۉزلری هم اوشبو حوض‌گه توشیب کېتیب، جان بېرگن.
منبع‌نینگ معلوم قیلیشیچه، مذکور ایکی ییگیت هم فاریاب ولایتی، خواجه سبزپوش اولوسواللیگی‌نینگ بایقیزی قیشلاغی یشاوچیسی اېکن.
اَیتیش کېره‌ک که، طالبان افغانستان‌ده قیته قدرت‌گه ایریشگنیدن کېین فقر و چېکلاولر میزانی کۉپ درجه‌ده آشگن. شو باعث اوشبو مملکت یشاوچیلری کۉپینچه‌لیک، ناقانونی یۉللردن تشقی اولکه‌لر تامان یۉل آله‌دیلر که اَیریم پیت‌لر مقصدگه ایریشمسدن، بو یۉللرده حیات‌لرینی قۉلدن بېریشه‌دی.
