جنوری آیی نینگ ۲۴ – سی، خلق‌ارا اۉقیش کونی، کیریب کیلیشی بیلن دنیا بویلب بیرقنچه تشکیلات‌لر، ینه بیربار طالبان حکومتی تامانیدن افغانستان‌ده قیزلردن اۉقیش حقی آلینگنی‌گه قرشی عکس‌العمل بیلدیردی.
خلق‌ارا کیچیریم تشکیلاتی و افغانستان‌ده بیرلشکن ملت‌لر تشکیلاتی نینگ نماینده‌لیگی یاده یوناما بو خصوصده، هر بیری علاحده بیانات ترقه‌تیب، طالبان حکومتی‌دن افغانستان قیزلرینی اۉقیش حق‌نی قیته بیریلیشی‌نی سوره‌شگن.
بو جمله‌دن خلق‌ارا کیچیریم تشکیلاتی، افغانستان قیزلرینی اۉقیش حق‌نی قولب_قوتلش مقصد امضا توپلش بیر کمپاین هم یۉلگه قویگن.
خلق‌ارا کیچیریم تشکیلاتی، اۉقیش کونی مناسبتی بیلن ترقه‌تگن بیاناتی‌نی بیر بولیمیده ایتیشیچه: «طالبان حکومتی افغانستان خلقی اینقسه خاتن_قیزلر حقی‌نی قولب_قوتلش خصوصیده بیرگن وعده‌لرینی نظرگه توتمه‌ی، بلکیم زوره‌وانلیک‌لر و چیکلاولرنی کوپه‌یتیرگن.»
بونگه قوشیمچه، افغانستان‌ده بیرلشکن ملت‌لر تشکیلاتی نینگ نماینده‌لیگی یاده یوناما بو خصوصده، طالبان حکومتی‌دن جنسیت‌نی نظرگه توتمه‌ی افغانستان‌نینگ هر بیر فقراسی‌گه اۉقیش زمینه‌سی یره‌تیلیشی‌نی حمایه قیلیش‌نی سۉره‌شگن.
افغانستان‌ده بیرلشکن ملت‌لر تشکیلاتی نماینده‌لیگی یاده یوناما نینگ باشلیغی روزا اوتنبایوا، افغانستان قیزلری اوچون اۉقیش زمینه‌سی قیته یره‌تیلیشی‌نی دنیا بویلب بوتون مملکت‌لر جمله‌دن اسلامی اولکه‌لر ایسته‌گی دیب، اۉرغوله‌شگن.
عینی حالده، بیرلشکن ملت‌لر تشکیلاتی نینگ باش پناه ایزلاوچیلر بوییچه کمیسارلیگی هم افغانستان‌ده قیزلرنی اۉقیش حقی بو مملکت اهالیسی‌نی امیدی دیب، افغانستان قیزلرینی بو حق‌نی قولب_قوتلش‌نی بیلدیرگن.
دیمک، اوتکن ایکی ییل جریانیده، افغانستان‌گه حاکمیت تیپه‌سیگه تورگن طالبان حکومتی، ایچکی و خلق‌ارا ایسته‌ک‌لرگه قرشی، افغانستان قیزلرینی اۉقیشی اوچون چیکلاو یره‌تکن و حاضر مکتب دوریده، آلتینچی صنف‌دن یوقاری قیزلر یوزیگه مکتب یاپیلگن و شونینگدېک بیلیم یورت ایشیک‌لری هم قیزلر اونگیده یاپیق دیر.
