افغانستان‌ده کمیده ۲۰ ییل حاکمیت‌ده بۉلگن جمهوریت تیزیمی اساسی قانونی‌ده، پشتو و دری تیللری یانیده، مملکت هر بیر منطقه‌سیده یشاوچی خلق نینگ اۉز آنه تیلی اوچینچی رسمی تیل دېب تاکیدلنگن اېدی.
شونینگدېک بو قانون بویروغی‌گه اساس دولت مملکت برچه تیللری رواجلنیشی اوچون ریجه‌لر قۉلگه آلیب عملگه آشیریشی کېره‌ک دیر.
بو حقده افغانستان نینگ جمهوریت تیزیمی دوریده‌گی اساسی قانونی ۱۶ – ماده‌سی نینگ بیر بولیمیده کېلیشیچه “دولت افغانستان برچه تیللری رونق تاپیشی و رواجلنیشی اوچون تاثیرلی ریجه‌لر تیارلب عملگه آشیره‌دی”
جمهوریت تیزیمی‌ده حکومت تامانیدن افغانستان‌ده اۉزبېک تیلی رواجلنیشی اوچون اساسی قانون نینگ بوندی بویروغی بۉلگن بیرحالده، ییترلیچه ایش بجریلمه‌گن بۉلسه هم، بیراق حاضر طالبان دوریده بو حاکمیت بوندی بیر قانونی بویروغ بیلن هم دوچ اېمس. چونکه بو حاکمیت‌نی حاضرگه قدر هیچ قندی بیر اساسی قانونی یۉق دیر.
طالبان بو قانون‌سیزلیگی، مذکور حاکمیت نینگ کیله‌جگده افغانستان‌ده اۉزبېک تیلی و ادبیاتی برابریده‌گی یانده‌شوونی ناانیق حالده قالدیریب کېله‌دی.
عینی حالده، طالبان حاکمیتی دوریده، افغانستان حاکمی اوله‌راق اۉزبېک تیلی رواجلنیشی اوچون، حاضرگه قدر سیزیلرلی بیران ریجه هم اۉزی‌دن کۉرسه‌تمه‌گن بیرحالده، ایریم قرارلری بو تیل رواجی‌گه قرشی اېدی.
بو قرارلر جمهوریت دوریده، مطبوعات بولیملریده اۉزبېک تیلی نشراتی فعال بۉلگن بیر قنچه دولتی اداره‌لرده بو تیل‌ده بۉلگن نشرات تۉخته‌تیلیشی، مکتب‌لرده اۉزبېک تیلی درسلیک کتابلری و اوقیتووچی‌لری آزلیگی و شونینگدېک بیلیم یورت‌لرده اۉزبېک تیلی استادلری تدقیقاتی ایجادلرینی فارسچه و پشتونچه تیللریده یازیشی بویروغ بېریلگنیدن عبارت دیر که طالبان تامانیدن اۉزبېک تیلی رواجلنیشی‌گه قرشی قۉلگه آلینگن.
