سکیزینچی مارچ خلق‌ارا خاتین-قیزلر بیردملیک کونی مناسبتی بیلن، گوهرشاد بیگم پلتفورمی تامانیدن نشر اېتیلگن بیانات‌ده، افغانستان‌ده خاتین-قیزلرگه قرشی بۉلگن چیکلاولر بیکار اېتیلیشی تاکید اېتیلگن.
بو پلتفورم اعضالری، اۉز بیانات‌لریده، افغانستان عیاللری نینگ جسارتلی کوره‌شیش‌لریدن قدرلب، اولرنینگ اراده‌لری هیچ بیر کوچ تاثیری آستیده قالمه‌ی دېب بیلدیرگن.
اوشبو پلتفورم نینگ بیاناتیده کېلیشیچه ” افغانستان نینگ کوره‌شچن و توشینگن عیاللری نماینده‌لیگیده «گوهرشاد بیگم پلتفورمی» هیچ بیر کوچ عیاللر نینگ ایرکین‌لیک و عدالت‌گه قۉل تاپیش اوچون بۉلگن اراده‌لرینی اوچیریش‌گه قادر اېمس دېب توشینه‌دی. بیز خاتین-قیزلرنینگ اۉقیش، ایشلش، اجتماعی و سیاسی ییریک قرارلرده حصه‌سی و ایرکین و آبرولی بیر حیات‌لریگه تاکید قیله‌میز.“
عینی حالده گوهرشاد بیگم پلتفورمی جماعه رواجلنیشی اوچون عیاللر حضوری اونملی بۉلگنینی تاکیدلب یازیشیچه ” بیز بیر جماعه نینگ رواجی و آسایشته‌لیگی عیاللر نینگ فعال و تاثیرلی حضوری‌گه باغلیق بۉلگنینی اونوتمه‌یلیک.“
گوهرشاد بیگم پلتفورمی اعضالری، خلق‌ارا هم‌جمعیتی، انسان حقلری تشکیلاتلری و بوتون اویغاق وجدان‌لردن، افغانستان خاتین-قیزلریدن بۉلگن حمایه‌لرینی کوچه‌یتیریش‌لرینی هم سۉره‌دی.
