قندوز شهری بیر چیککه‌سیده بیر لقمه نان تاپیش امیدیده توپلنگن اهالی اقتصادی آغیر شرایط‌لری و ایش‌سیزلیک معماسی کونسه‌یین جدی‌لشیب باره‌یاتکنیدن شکایت قیله‌دیلر.
حیات الله شو شخص‌لردن بیری دیر که قلعه‌زال تومنی‌دن، ایش تاپیش اوچون قوندوز شهری‌گه کېلگن.
قندوزلیک بو ییگیت اۉزبېک تی‌وی گه ایتیشیچه، کۉپینچه کونلری ایش‌سیزلیکده اۉته‌دی و ایش بۉلگن تقدیرده هم محنت حقی و عایدی جُده آز دیر.«مجبورلیک و خوار و زارلیکده‌میز، مملکتده ایش یۉق اقتصاد آغیر، اوی‌گه بیراز نان پولینی تاپیب کېته‌من دېب کېلدیم. ایش بۉلگنده کونی‌ده ۱۰۰ الی ۱۵۰ افغانی قاله‌دی بۉلمسه هیچ نرسه یۉق دیر.»
شونینگدېک بو ییرده کېلگن باشقه اهالی اینقسه یاش-ییگیت‌لر هم ایش‌سیزلیک درجه‌سی کیسکین کوتاریلگنی و اولر روزغاری اوچون ییترلیچه عاید یۉق‌لیگیدن شکایت قیله‌دی.
بو اهالی‌دن ینه بیری نینگ ایتیشیچه «شو ییرده روزغاریم اوچون کېلیب‌من، پول تاپیب روزغاریمنی اۉتکزه‌ی دېب، معمامیز شو ایش یۉق‌لیگی دیر. اېرته‌مینندن آقشمگچه شو ییرده کېله‌میز بو ییرده هم بیکارلیک دیر.»
قوندوزلیک احمدالله نینگ داستانی فرقلیراق، احمدالله روزغاری اوچون کمیده ۸ ییل اوزگه یورتلرده مهاجرلیک هم قیلگن. بیراق ینه وطنی‌گه قیتیب کېلیب ایش‌سیزلیک کبی آغیر احواللرنی باش‌دن کېچیرماقده دیر. «یاشلر همه‌سی ایش‌سیز، روزغاریم اوچون ۸ ییل مسافرلیک قیلدیم ایش‌سیزلیک و بخت‌سیزلیکده‌میز ایش‌سیزلیکدن نیمه قیلگنیمیزنی بیلمه‌یمیز. آیی‌ده اوچ مینگ افغانی عایدی بۉلگن بیر ایش بۉلسه هم بیز خرسندچیلیک بیلن ایشله‌یمیز اۉز وطنیمیزده.»
احمدالله اقتصادی کۉرینیش‌دن قشاق‌لیکده بۉلسه هم. لیکن فکری بای دیر. قوندوزلیک بو کیشی روزغار تشویش‌لری و ایش‌سیزلیک قیغولری یانیده، اۉقیش‌دن محروم اېتیلیب کېله‌جکلری ناانیق قاله‌یاتکن قیزلر تقدیری‌دن هم خواطرده و تیزلیک بیلن اۉقیش ایشیک‌لری قیزلر یوزیگه هم آچیلیشینی سۉره‌یدی.
احمدالله نینگ کۉپه‌یتیریشیچه «مکتب‌لر آچیلسین و بیزنینگ سینگیللریمیز هم درس اۉقیسین. بیز هم خواهله‌یمیز سینگیللریمیز داکتر و معلم بۉلسه بو عیب اېمس.»
قوندوز شهری‌ده کۉپلب قیینچیلیکلر بیلن دکان‌دارچیلیک کبی بیر کسب یره‌تکن شخص‌لر هم اهالی نینگ آغیر اقتصادی وضعیتی باعث، ایشلری قانقرلی بۉلمه‌گنیدن شکایت قیله‌دی.
ایتیش کېره‌ک که افغانستانده سونگی ییللر ایچیده ایش‌سیزلیک معماسی جدی‌لشگن و بو معما خارج مملکتلریدن افغانستان‌لیک مهاجرلر چیقاریلیشی کۉپه‌یشی بیلن تاباره جدی‌لشگن.
