اخبارات عصریده زمانه‌وي تکنالوژي‌لر حیاتیمیزگه تاباره کۉپراق کیریب باریپتی. بوگون حتا باغچه تربیه‌لنووچیسی هم تېلفوندن، اونده‌گی علاوه‌لر و اینترنتدن فایده‌لنیشنی اۉرگنیب آلیپتی. کتّه‌یو کیچیک آره‌سیده اینترنتدن فایده‌لنووچیلر، وقتینی کۉپراق او بیلن اۉتکزووچیلر آرتیپتی. کېله‌جک حیاتنی اینترنت و حلی کشف اېتیلمه‌گن یوقاری تکنالوژي‌لرسیز تصور اېتیب بۉلمه‌یدی. تۉغری، اولر ایجابي و سلبي خصوصیتلرگه اېگه. بیراق یوکسک تکنالوژ‌لردن اونوملی فایده‌لنمسلیک یاکه یاشلرگه آله‌بۉجی قیلیب کۉرسه‌تیش فقط و فقط ضرر کېلتیره‌دی، خلاص. یوقاریده‌گی فکرلر اجتماعي ترماقلرگه هم تېگیشلی. اینترنت و اجتماعي ترماقلردن فایده‌لنیشده هم آلتین قاعده‌گه – معیارنی اونوتمسلیک شرطیگه عمل قیلیش ضرور. کېلینگ، اولر نینگ ایجابي جهتلری حقیده مشاهده یوریته‌میز.
ایزلش و ملاقاتده‌گی قوله‌یلیک.
اجتماعي ترماقلرده ویدیو، اودیو، صور‌ت، بیرار-بیر شخص یاکه مسلکداشلرنی تاپیش جوده آسان. بونده‌ی سایتلرده فایده‌لنووچیلر رۉیخطدن اۉتیش چاغی کۉپینچه اسمی شریف، توغیلگن وقتی، یشش منزلی، اۉقیگن، ایشله‌گن جایلری و عینِ دَمده‌گی فعالیتی حقیده معلوماتلر کیریته‌دی. بو معلوماتلر علاقه‌لری اوزیلگن صنفداشلر، کورسداشلر و تنیش-بیلیشلر بیر-بیرلرینی تاپیشلریگه یاردم بېره‌دی. یقینلر بیلن باغلنیش آسان و قوله‌ی. جوده کۉپ اجتماعي ترماقلر و اولر نینگ مابیل علاوه‌لری آرقه‌لی یازمه، تاووشلی و تصویرلی شکلده ملاقات قیلیش ممکن. بوندن تشقری، علاقه خدمتلری جوده ارزان. دنیا نینگ نریگی چېکّه‌سی بیلن یاکه قۉشنی شهر-قیشلاقلر بیلن باغلنیش بیر خیل – چۉنتکباپ نرخده. بونده‌ی قوله‌یلیک عادي علاقه واسطه‌لریده یۉق.
اخبارات تاپیش و المشیشده‌گی یېنگیللیک.
اجتماعي ترماقلرده بیرار موضوعده‌گی اخباراتنی یېنگیللیک بیلن تاپیش ممکن. دېیلیک، سلامتلیک ساحه‌سیگه قیزیققن کیشی عینِ شو یۉنه‌لیشده‌گی کانال و گروهلرگه اعضا بۉلیشی ممکن. تورلی ساحه‌لرده مصلحتلر آلیش، کېره‌کلی بیلیم و تصورلر حاصل قیلیش امکانیگه اېگه. اجتماعي ترماقلر، اینیقسه مسنجرلر اخبارات المشیشده جوده کتّه قوله‌یلیکلر بېردی. تورلی شکلده‌گی اخباراتلرنی اوزه‌تیشنی کېسکین آسانلشتیریب یوباردی. یوباریلگن معلوماتلر مسنجلرنینگ اۉزیده سقلنیشی سببلی اینترنتی بار ایسته‌لگن جایده اولردن فایده‌لنیش ممکن، حتا اۉز قوریلمنگیزدن اۉچیریب یوبارگن بۉلسنگیز هم.
بوگون ایلغار اۉقیتووچیلر اجتماعي ترماقلرنینگ انه شو خصوصیتیدن اوسته‌لیک بیلن فایده‌لنیشیپتی.
شخصي تربیه، اۉزینی اۉزی رواجلنتیریش واسطه‌سی.
اجتماعي ترماقلرنینگ اېنگ مقتاولی، اهمیتلی جهتلریدن بیری – علم آلیش، کسب-هنر اۉرگنیشده‌گی بې‌قیاس یاردمیدیر. کونده‌لیک تورموشده دوچ کېلینه‌دیگن تورلی یوموشلرنی بجریشنی هم اینترنت، خصوصاً اجتماعي ترماقلر یاردمیده آسان اۉزلشتیریش ممکن. عادي مثال، عیاللر بیچیش-تیکیش یاکه پزنده‌لیک سِرلرینی یوتوبې ترماغیده‌گی کاناللردن بې‌ملال اۉزلشتیره آله‌دی.
زمانه‌وي متیماتیکه، دستورلش، اقتصادیات اساسلری، پسیکولوژي، چېت تیللر کبی بوگون نینگ اېنگ دالضرب، طلب یوقاری بۉلگن فن یۉنه‌لیشلری بۉییچه هم ایسته‌لگنچه ویدیو درسلر، قۉللنمه‌لر تاپیش ممکن. ویرتوال اودیوتوریه اوچون تشکیل اېتیله‌دیگن آنلاین درسلرده قتنه‌شسه بۉله‌دی. بیر سۉز بیلن ایتگنده، اجتماعي ترماقلر ارزان و بې‌پول تعلیم آلیش اوچون امکانیت اېشیکلرینی جوده کېنگ آچگن.
بو نه‌فقط علم آلیش، بلکه علم ترقه‌تیشده هم قۉل کېله‌دی. تورلی ساحه متخصصلری اۉز پیداگوژیگ مهارتلرینی نمایش اېتیشی، ویرتوال اۉقووچیلر ییغیشی ممکن. اولر کون کېلیب بو متخصص نینگ حیاتده‌گی رئال طلبه‌لریگه ایلنیشی احتمالی هم یوقاری. بوندن تشقری، آبونه‌چیلری کۉپ و ویدیولری نمایشی یوقاری کانال اېگه‌لری ریکلام آرقه‌لی قۉشیمچه درآمدگه اېگه بۉله آله‌دی. جهانده عینِ شو یۉنه‌لیشده میلیونرگه ایلنگن بلاگېر و ولاگېرلر جوده کۉپ.
بیزنس یوریتیشده بې‌منت یاردمچی.
بوگون جوده کۉپ سودا، ایشلب چیقریش و خدمت کۉرسه‌تیش بیلن شغللنووچی تدبیرکارلر اجتماعي ترماقلردن ثمره‌لی فایده‌لنیپتی. الکترون تجارت رواجلنگن دنیاده کېنگ ترقه‌لگن.
بوگون بیر‌گینه تېلېگرا‌م آرقه‌لی ایش بیلرمانلیک فعالیتینی مثلی کۉریلمه‌گن درجه‌ده یوکسه‌لتیریب یوباره‌یاتگنلر تله‌ی‌گینه.
بعضی اجتماعي ترماقلرده اېسه ریکلام‌نی تنلنگن یاکه کېره‌کلی اودیوتوریه‌گه یېتکزیش امکانی بار. بونی فایده‌لنووچی نینگ قیزیقیشلرینی حسابگه آلیب ترماق نینگ اۉزی الگاریتملر اساسیده بجریشی ممکن.
تورلی اجتماعي اکسیه‌لر و یاردملر
اجتماعي ترماقلرده آغیر حیاتي وضعیتگه توشیب قالگنلر، یېتیم-یېسیرلر، معلوللر، بیر سۉز بیلن ایتگنده مادّي-معنوي حمایه‌گه محتاج قتلمگه یاردملر اویوشتیریش ممکن. بو اینیقسه سۉنگگی ییللرده تاباره کېنگ قولاچ یاییپتی. منه شونده‌ی کۉمکلر کۉپلب کیشیلر نینگ دردیگه مرهم بۉله‌یاتگنی حقیده عامه‌وي اخبارات واسطه‌لری تېز-تېز خبر بېریب توریبدی.
یاردم اکسیه‌لریدن محتاجلرنینگ اۉزی‌گینه فایده تاپمه‌یدی. بلکه خیر-احسان قیلگن، بیراوگه یاردم قۉلینی چۉزگن کیشی هم معنوی-روحي پاکلنه‌دی، حیاتگه محبتی، غیرت-شجاعتی آرته‌دی.
ایجادکارلر و باشقه ساحه وکیللری اوچون کېنگ میدان
قلم اهلینی ایجادی تنیته‌دی. بعضیده باشلاوچیلر، حتا تجربه‌لی ژورنالیستلر اوچون هم باسمه یاکه الکترون نشرلردن «جای تېگمه‌ی قالیشی» ممکن. چونکه هر بیر نشر اۉز طلبیگه، قیزیقیشیگه اېگه. اجتماعي ترماقلرده‌گی کاناللر اېسه ژورنالیست و بلاگېرلر اوچون کتّه میدان آچیب بېره‌دی. هر کیم اۉز امکانی و اقتداریگه، حرکتی و حوصله‌سیگه قره‌ب آبونه‌چی ییغیشی ممکن. بوندن تشقری، اجتماعي ترماقلر تېزکارلیگی بیلن هم اوستون. عینِ دَمده‌گی واقعه-حادثه حقیده اۉشه زهاتی یاکه تۉغریدن-تۉغری خبر بېریش ممکن. اولرنی یوریتیش اوچون جوده کتّه تخنیکي ملَکه هم طلب اېتیلمه‌یدی. بو امکانیت نه‌فقط ایجادکارلر، بلکه باشقه ساحه وکیللری اوچون هم. حاضر اجتماعي ترماقلرده بیر نېچه اۉن مینگلب آبونه‌چیلریگه اېگه حقوقشناسلر، شفاکارلر، علم اهلی، آشپزلر و باشقه‌لر نینگ کاناللری فعالیت یوریته‌دی. بو اۉز-اۉزینی نمایان اېتیش، تنیلیش و موفقیت قازانیش اوچون قوله‌ی یۉلدیر. بوندن تشقری، فکرلرینی یازمه افاده اېتیب باریش کیشی نینگ عقلي صلاحیتی اۉسیشیگه هم تورتکی بېره‌دی.
