روسیه تشقی ایشلر وزیری سرگی لاوروف بو مملکت، اروپاگه قرشی حربی هجوم قیلیشگه هم تیار اېکنینی اعلام قیلگن. اونگه کۉره، حاضر بو ایشگه حاجت یۉق بیراق اروپا، روسیهگه قرشی تهدیدلرینی عملگه آشیرسه، روسیه حربی هجومگه تیار دیر.
سرگی لاوروف بو مسالهنی، روسیهنینگ «انتیوی» تلویزیون کانالی بیلن بۉلگن صحبتیده تیلگه آلگن.
روسیه تشقی ایشلر وزیرینینگ تاکیدلشیچه، حاضرگی شرایطده اروپا بیلن اوروشگه حاجت یۉق بیراق اروپا مملکتلری بونی خواهلهگن تقدیرده یوز بېریشی ممکن دیر.
بو مساله شوندی بیرحالده یوز بېرماقده دیر که اروپا مملکتلری، اوکراین اوروشی باشلنگنیدن بیری، روسیه اولرگه قرشی هجوم قیلیشی ممکنلیگی خصوصیده هم تیارگرلیک کۉرماقده دیر.
اوشبو تیارگرلیکلر دوامیده، اروپا اتفاقی سونگگی ییللر ایچیده اۉزینینگ مدافعه بودجهلرینی کۉپهیتیریب، بو بودجهلرنی یوزلب میلیاردگه ییتیشتیرگن.
عینی حالده، روسیه بیلن چیگرهداش بۉلگن اروپا اتفاقی اعضالری هم اخیرگی بیر ییل ایچیده، روسیهنینگ دُرونلر اولر آسمانیده کۉرینگنینی معلوم قیلگن اېدی.
