بوگون فبروی آیینینگ ۹ – کونی، شعریت ملکینینگ سلطانی، دولت اربابی همده بویوک متفکر و علامه حضرت امیرالکلام میرعلیشیر نوایینینگ توغیلگن کونلری ۵۸۵ – ییللیگی بیلن تېنگ.
بوندن چمهسی آلتی عصر ایلگری هرات شهریده توغیلیب، انسانیت تاریخیده اۉزیدن ییریک میراثی قالدیرگن مدنیت و سیاست اربابینینگ آتی بوگون مدنیت و تاریخنی بیلگن هر بیر انسان اوچون فخرلی توییلسه، بیراق بو بویوک سیمانینگ یورتیدهگی حاکمیت اونگه نسبتن بیاعتبار قالماقده دیر.
افغانستان سابق حکومت دوریده، حضرت نوایینینگ توغیلگن کونیگه بغیشلب احتفال و ییغین تشکیللشتیریلیب کېلگن بۉلسه-ده بیراق بو مملکتنینگ حاضرگی حاکمیتی بۉلمیش طالباندن بو خصوصده هیچ قندهی بیر سعیوحرکت حاضرگچه کۉرینگن اېمس.
دېیرلی حاضرگچه طالباننینگ مدنیت نامیده بۉلگن وزیرلیگی هم بو خصوصده جیملیکنی اختیاری قیلیب، حتا که بو وزیرلیکنینگ رسمی ویبسایتیده هم حضرت نوایی حقیده نیچه سۉز یازیلمهی توریبتی. بو دېگنی دنیا آتی بیلن فخرلنیب کېلهیاتکن نوایی بیلن اۉز یورتینینگ حاکمیتی حسودلیک قیلیب، اونگه تعصب کۉزی بیلن قرهشماقده دیر.
طالباننینگ بو اعتبارسیزلیگی اینیقسه بو حاکمیتنینگ «افغانستان مدنیت و اخبارات وزیرلیگی» دېگن ییریک نامی بۉلگن وزیرلیگی، افغانستانده توغیلیب، انسانیت تاریخیده فخرلی سیماگه اَیلهنگن حضرت نواییگه قندهی بیر حرمتی بارلیگی حقیده سوال پیدا بۉلهدی.
طالبان بو حقده شوندهی بیرحالده بیاعتبارسیز قالماقده دیر که بو حاکمیتدن، مزارشریف شهریده نوایی هیکلی یۉق اېتیلگندن کېین، بېرگن وعدهلری نیمه بۉلدی؟ دېگن سوراق هم موجود دیر.
طالبان حضرت نواییگه بیاعتبارلیگینی کۉرسهتیب، بو بویوک سیما یادگارلیگی حقیدهگی وعدهلرینی عملگه آشیرمهی کتته بیر خلققه یلغان اَیتهیاتکن بۉلیشی ممکن. لیکن اولرنینگ بو قیلمیشی نوایی عظمتیدن آزهیتیرمهیدی بلکه بو حرکت، طالبان نواییدن بیگانه و نوایی خلقی و مدنیتیدن بیزارلیگینی اثباتلب بېرهدی.
