طالبان تشقی ایشلر وزیرلیگی امیرخان متقينینگ بیرلشگن ملتلر تشکیلاتی باش کاتبینینگ سیاسي مسألهلر بۉییچه اۉرینباسری رزماری دیکارلو بیلن تیلفون آرقهلی ملاقات قیلگنینی ایتدی. اوشبو صحبتده پاکستاننینگ افغانستانگه عملگه آشیرگن هوا هجوملری محاکمه قیلینگن.
طالبان تشقی ایشلر وزیرلیگینینگ خبریگه کۉره، متقينینگ فکریچه، پاکستاننینگ سۉنگگی هوا هجوملریده تینچ اهالی نشانگه آلینگنی اوچون چوقور خواطر بیلدیرگن.
طالبان وزیرینینگ ایتیشیچه، پاکستان تامانیدن نشانگه آلینگنی ادعا قیلینگن قوراللی شخصلر اۉلدیریلمهگن و «بو پاکستاننینگ افغانستانگه قرشی عیبلاولری اساسسیزلیگینی اثباتلهیدی».
بیرلشگن ملتلر تشکیلاتینینگ افغانستاندهگی وکالتخانهسی هم اوشبو هجومده ۱۳ تینچ اهالی، جملهدن عیاللر و بالهلر، هلاک بۉلگنینی تصدیقلهگن.
بیراق، پاکستان افغانستانده جایلشگن پاکستان یریم حربي گروهلرینینگ مرکزی و یشیرین مسکنلری نشانگه آلینگنینی ادعا قیلگن.
امیرخان متقينینگ ایتیشیچه، افغانستانده هېچ قندهی یریم حربي گروه موجود اېمس و برچه تامانلر، جملهدن دیپلوماتیک وکالتخانهلر، سۉنگگی هوا هجومی بۉلگن جاینی تېکشیریب، وضعیتنی یقیندن کوزهتیشی ممکن.
طالبان تشقی ایشلر وزیرلیگی خبریگه کۉره، رزماری دیکارلو سۉنگگی هجومدهگی تینچ اهالی قربانلریگه چوقور افسوس بیلدیریب، اوشبو هوا هجوملری مسألهسینی بیرلشگن ملتلر تشکیلاتی اعضا دولتلری و برچه تامانلر بیلن محاکمه قیلیشینی ایتگن.
بیرلشگن ملتلر تشکیلاتینینگ اۉرینباسری و طالبان وزیری دوحهدهگی اوچرهشوولر، ایشچی گروهلر و باشقه تېگیشلی مسألهلرنی هم محاکمه قیلگن.
طالبان تشقی ایشلر وزیرلیگی تأکیدلهگنیدېک، صحبتده اېریشیلگن یوتوقلرگه قرهمهی، قۉشمه سعی-حرکتلر آرقهلی ینهده کۉپراق ترقیات تأمینلش یۉلیده ایش دوام اېتتیریلیشی امید قیلینگن.
