بیرلشگن ملتلر تشکیلاتینینگ بالهلرنی حمایه قیلیش جمغرمهسی (یونیسف) جاپان حکومتی افغانستاننینگ فوق العاده وضعیتلر، طبيعي آفتلر و قاچقینلردن ضرر کۉرگن جماعهلریگه تېزکار قوتقروو یاردملرینی کۉرسهتیش اوچون ۴.۴میلیون دالر اجرهتگن.
یونیسفپنجشنبه (۸حوت) کونی اعلان قیلگن بیاناتیده ایتیشیچه، اوشبو مبلغ بیلن۶۰ مینگدن آرتیق آدمگه، اولرنینگ یرمی بالهلر، تازه سوو، ساغلیقنی سقلش و بالهلرنی حمایه قیلیش بۉییچه قوتقروو خدمتلری تقدیم اېتیلهدی.
افغانستاندهگی جاپان اېلچیسی کنیچی ماساموتو «جاپان افغانستان اهالیسی، خصوصاً کېنگ قمراولی قاچقینلیک، طبيعي آفتلر و اقلیم اۉزگریشی بیلن یوزلشهیاتگن بالهلر و عیاللر بیلن بیرگه تورهدی» دېگن.
یونیسفنینگ معلوماتیگه کۉره، جاپان تامانیدن عملگه آشیریلگن استراتژیک لایحهسی فقط تېزکار یاردم بیلن چېکلنمهی، بلکه بالهلر و جماعهلرنی اوزاق مدتده حمایه قیلهدیگن چیدملیلیک تیزیملرینی یرهتیشگه قرهتیلگن.
افغانستاندهگی یونیسف نمایندهسی تاجالدین اویواله شوندهی دېگن: «جاپان و یونیسف نینگ افغانستان بالهلری اوچون همکارلیگی عمومي قدریتلر و اوزاق مدتلی استقبالگه اساسلنگن. بیز بیرگهلیکده آدملرنی حمایه قیلووچی و جماعهلرگه اۉز چیدملیلیگینی شکللنتیریش امکانینی بېرووچی تیزیملرنی مستحکملهدیک»
یونیسف شونی تأکیدلهیدیکی،۲۰۲۵ییلده۲.۸میلیوندن آرتیق آدم نینگ ایران و پاکستاندن افغانستانگه قَیتیشی بیلن، اولرنینگ تخمیناً۶۰ فایزی عیاللر و بالهلر بۉلگن، بشری یاردملر احتیاجلر ینه-ده مرکّبلشگن.
بیرلشگن ملتلر تشکیلاتینینگ انسانپرورلیک یاردملر رهبری ادارهسی تامانیدن۲۰۲۵ ییلده اۉتکزیلگن افغانستان بۉییچه عمومي بهالشگه کۉره، اوی خۉجهلیکلرینینگ۶۷ فایزی قورغاقچیلیک و سوو تنقیصلیگینی قید اېتگن.
کۉپ قَیتیب کېلگنلرنی قبول قیلووچی حدودلر اوّلراق جدّي ایچ کېتمه کسللیگینینگ کۉپهییشینی قید اېتگن، بو اېسه کسللیکلرنینگ ترقهلیش خوفینی آشیرهدی.
