بیرلشگن ملتلر تشکیلاتینینگ افغانستان انسان حقلری حالتی بۉییچه مخصوص گزارشگری ریچارد بنت، اۉزبېک، پشتو و فارس تیللریده بیر بیانات ترقهتیب، افغانستانده میدیالر فعالیتی احوالی حقیده ینه بیربار فکر بیلدیردی.
ریچارد بنت، اوشبو بیاناتنی جهان مطبوعات اېرکینلیک کونی مناسبتی بیلن «اۉزبېک، پشتو و فارس» تیللریده نشر قیلدی.
بیاناتده، طالبان حاکمیتیده بۉلگن افغانستانده یېتکیرمهلر و ژورنالیستلر فعالیتی آغیر احوالده بۉلگنی یوزهسیدن خواطر بیلدیریلیب، حاضرده عادی اخبارات یېتکزیش جریانی هم جدّی توسیقلیکلر بیلن دوچ اېکنی تاکیدلنگن.
اونگه کۉره، ژورنالیستلر حاضرده مهم موضوعلر اینیقسه خاتین-قیزلر حقوقی خصوصیده خبر تیارلشگه قادر اېمس و شوندهی بۉلگن تقدیرده اولر حبسگه آلینیشی ممکن دیر.
شو بیلن بیرگه، ریچارد بنت اۉز بیاناتیده افغانستانده حتا یېتکیرمهلر بیلن صحبت قیلگن منبعلر هم تعقیب، کۉزهتوو و حبسگه آلیش تهدیدی بیلن دوچ اېکنینی بیلدیرگن.
عینی حالده، بیرلشگن ملتلر تشکیلاتینینگ بو وکیلی، ژورنالیستلر اېرکینلیک بیلن فکر بیلدیریشی و اېرکین فعالیتی اوچون کفالت بیریلیشی همده محبوس ژورنالیستلر تېزلیک بیلن و شرطسیز حالده آزاد اېتیلیشینی طلب قیلگن.
