بادغیس ولایتی، بالامرغاب اولسواللیگی موریچاق قیشلاغیدن بۉلگن بیبی صدیقه ناملی تورکمن قیز، مجبوری نکاحگه تَن بېرمهگنی اوچون هلی هم طالبان قماقخانهسیده سقلنیب کېلماقده دیر.
بو قیزنینگ قماقده سقلنیشی کۉپلب مناسبتلر و تنقیدلرگه سبب بۉلیب و بو قرار انسانی و اسلامی قدریتلرگه قرشی اېکنی تاکیدلنگن بۉلسه-ده بیراق طالبان حاضرگچه بوحقده اعتبار قرهتگن اېمس.
اۉتگن کون ایریم یېتکیرمهلر، طالبان سۉزلاوچیسی ذبیحالله مجاهدگه اساسلنیب، اوشبو قضیه تېکشیریلیشی حقیده خبر ترقهتگن اېدی. بیراق حاضرگچه بو تېکشیروو ایشلری باشلندیمی یا یۉقمی بوحقده طالبان هیچ نرسه دېمهگن.
شو بیلن بیرگه، طالبان بو قیز تقدیری و اونینگ حبسگه آلینیشیگه نسبتن تنقیدلر خصوصیده هم جواب حاضرگچه رسمی ایضاح بېرگن اېمس.
بو شوندهی بیرحالده دیر که صدیقهنینگ عایلهسی عدالت سۉرهب طالباننینگ تورلی ادارهلری جملهدن بو گروهنینگ رهبری هبتالله آخوندزاده ادارهسیگچه عریضه قیلگن. اما بو ادارهلرنی هیچ بیری صدیقه اوچون عدالت تامین قیلمهگن.
طالباننینگ بو اعتبارسیزلیگیدن سۉنگ، صدیقهنینگ آنهسی بیر ویدیو بیانات ترقهتیب بو خصوصده انسان حقلری فعاللریدن توجه قرهتیشلرینی سۉرهدی.
ایتیلیشیچه، طالباننینگ محکمه و تورلی ادارهلری، صدیقه تورکمن و عیال بۉلگنی و قضیه تامان پشتون اېرکک و طالبان ایچیده نفوذلی آدم بۉلگنی سبب صدیقهنی قماققه تشلنیشیگه قرار قیلگن.
