بوندن بیر هفته آلدین، بادغیس ولایتی بالامرغاب اولسواللیگینینگ موریچاق ناملی قیشلاغیدن بۉلگن بیبی صدیقه ناملی تورکمن قیزنینگ قماقده تقدیری حقیده، اۉزبېک تیوی بیلن معلوماتلر شریک اېتیلدی. بو خبر اۉتگن جمعه کېچهسی اۉزبېک تیوی تامانیدن نشر اېتیلگندن سونگ کینگ ترقهلیب، بو خصوصده کینگ فکرلر و مناسبتلر بیلدیریلیشگه باشلندی.
صدیقه ناملی تورکمن قیزنینگ احوالیگه نسبتن بیلدیریلگن مناسبتلرده کۉپینچه بو قیز حقیده عدالت تامینلنیشی و آتهسی یاشیده بۉلگن شخصگه مجبوری تورموشگه راضیلیک بېرمهگنی یالغیز گناهسی بۉلگن بو قیز تېزراق عایلهسی بغریگه قیتیشی طلب قیلیندی. بیراق بو طلب شونینگدېک صدیقه اوچون کوتیلگن انسانی عدالت حاضرگچه نظرده توتیلگن اېمس.
صدیقه قضیهسیدن اۉزبېک تیوی بیلن معلومات شریک قیلگن منبعلرگه کۉره، بو قیزنینگ قضیهسی طالبان ادارهلریده، بیر قیز و او هم تورکمن قیز اولهراق کۉزدن کېچیریلگن. دېیرلی صدیقهنینگ بو جنسیت و قومی کېملیگی همده خداینظر ناملی پشتون خلقیگه منسوب طالبان بیلن یقینده علاقهده بۉلگن شخصنینگ طالبان ایچیدهگی نفوذی عدالت اوستیده سایه تشلهگن.
شو بیلن بیرگه، طالبان حاضرگچه هم بو قیز اوچون اعتبارسیزلیگینی دوام بېریب کېلماقده و صدیقه عدالتسیزلیک بیلن همان قماقخانهده سقلنیب قالگن.
صدیقه قضیهسی کوتریلیب، طالبان حاکمیتیدهگی عدالتگه نسبتن جنسیت و قومیت تعصبنینگ اوستونلیگی تنقیدلر آستیگه آلینگن بۉلسهده، بیراق طالبان حاضرگچه نه فقط عدالت اۉرنهتیلیشی اوچون حرکت قیلمهگن بلکه منبعلرنینگ ایتیشیچه، صدیقهنینگ عایلهسی عدالت طلب قیلیب سېس چیقرگنلری اوچون هم باسیم آستیگه آلینگن.
منبعلرنینگ ایتیشیچه، طالبان صدیقه قضیهسینی تېزلیک بیلن تیکشیریب، بیگناه بیر قیزنینگ بوندن آرتیق عمری قماقده ضایع بۉلمسلیگی اوچون اعتبار قرهتگنی اۉرنیده، صدیقه یقینلرینی اونینگ آنهسیدن ویدیو بیانات ترقهتگنلری اوچون تعقیب و تیرگاو آستیگه آلگن.
شو بیلن بیرگه، بو جریانده صدیقه قضیهسی تامانیدن بۉلمیش خداینظر ناملی یاشی قرری آدم، بو قیزنینگ مجبوری نکاحسیگه آلیش خصوصیده توطیه و تهدیدگه هم قۉل اۉرگن.
منبعلرنینگ ایتیشیچه، خداینظر قضیهنی اۉز فایدهسیگه ایلنتیریش اوچون ایکّی شخصنی ساخته گواه توزاتگن و صدیقه یقینلرینی هم قورال بیلن تهدید قیلگن.
خلاصه قیلیب اَیتگنده، صدیقه فقط تورکمن و قیز بۉلگنی اوچون قماقده سقلنیب کېلماقده و طالبان بو قیز آزادلیگی اوچون هیچ قندهی اعتبار قرهتمهیپتی بو اېسه صدیقهنینگ تقدیری اوچون خواطرلرنی آشیریب بارماقده دیر.
