ایران تشقی ایشلر وزیری عباس عراقچی امریکا جمهور رییسی دونالد ترامپنینگ سۉنگّی بیاناتیگه جوابن، «ایران هر دایم هرمز بۉغازی خوفسیزلیگینی تأمینلب کېلگن و بوندن کېین هم شوندهی بۉلیب قالهدی»، دېدی.
ایران تشقی ایشلر وزیری بوگون کېچقورون (دوشنبه، ۲۲-سرطان) ترامپ نینگ تروث سوشیال ترماغیدهگی پُستی حقیده شوندهی یازدی: «امریکا جمهور رییسی مطلقا تۉغری اَیتماقده. هرمز بۉغازی آرقهلی سودا کېمهلری نینگ خوفسیز اۉتیشینی تأمینلهیدیگن تامان بو خدمت اوچون حق آلیشگه حقلیدیر.»
عراقچی سۉزیده دوام اېتیب: «البته،۲۰ فایز جوده یوقاری. بیز اېسه عدالتلی بۉلهمیز!»، دېب یازدی.
دونالد ترامپ بوگون امریکا هرمز بۉغازی نظارتینی اۉز قۉلیگه آلیشی، اونی حمایه قیلیشی و بوندن بویان «هرمز بۉغازی نینگ قۉریقچیسی» صفتیده تنیلیشینی معلوم قیلگن اېدی.
اونینگ ایتیشیچه، امریکا اوشبو دېنگیز یۉلهگی آرقهلی کېمهلرنینگ خوفسیز حرکتلنیشینی تأمینلش عوضیگه 20 فایز مقداریده باج اوندیرماقچی.
بوندن آلدین اېران هم هرمز بۉغازی آرقهلی کېمهلرنینگ خوفسیز قتناوینی تأمینلش اوچون تۉلاو اوندیریلیشینی معلوم قیلگن اېدی.
بیراق ایران اسلام انقلابی قۉریقچیلری کېچه امریکا بیلن کېسکینلیک کوچهیگنیدن سۉنگ، «هرمز بۉغازی کېینگی آگاهلنتیریشگچه و امریکانینگ منطقهدهگی ارهلشووی توگهمهگونچه یاپیلهدی همده هېچ بیر کېمه حرکتلنه آلمهیدی»، دېب اعلان قیلگن.
شونگه قرهمهی، دونالد ترامپ بوگون هرمز بۉغازی آچیق اېکنینی و ایران بیلن یاکه اېرانسیز هم آچیق قالیشینی دعوا قیلدی.
امریکا و اسرایلنینگ ایرانگه هجوملری باشلنگنیدن سۉنگ، ایران هرمز بۉغازینی یاپگن اېدی. شوندن کېین جهان بازاریده نفت نرخلری مثلی کۉریلمهگن درجهده آشگن.
