امریکا قۉشمه ایالتلری جمهور رییسی دونالد ترمپ ایران مذاکرهلر چوکیسیگه قَیتمسه، کېلهسی هفتهدن مملکتدهگی کۉپریکلر و الکتر ستشنلریگه ضربهلر بېریلیشی حقیده آگاهلنتیردی.
دونالد ترمپ فاکسنیوز تلویزیونیگه بېرگن صحبتیده ایراننینگ «امریکا بیلن کېلیشوودن باشقه چارهسی یۉق» اېکنینی ایتدی.
اونینگ سۉزلریگه کۉره: «امریکا کوچلری هجوملرینی کوچهیتیرهدی و مېن “یېترلی” دېگونیمچه بو دوام اېتهدی.»
ترمپ ینه شوندهی دېدی: «ایران رسميلری کېلیشوو توزیشنی خواهلهیدی، اما هر سفر کېلیشووگه اېریشگچ، اونی بوزهدی.»
امریکا جمهور رییسی تهرانگه مراجعت قیلیب: «یخشیسی، کېلیشووگه راضی بۉلینگ. عکس حالده سیزلر اوچون هېچ نرسه قالمهیدی.» دېدی.
ترامپ ایران حدودیده احتمالي قوروقلیکدهگی حربي عملیات حقیده هم فکر بیلدیریب، بوندهی عملیاتنی امریکا اېمس، باشقه کوچلر عملگه آشیریشی ممکنلیگینی ایتدی.
اونگه امریکا ایرانگه قوروقلیک قۉشینلرینی یوبارهدیمی، دېگن سوال بېریلگنده، ترامپ شوندهی جواب بېردی:
«بو حقده گپیریشنی ایستهمهیمن. اگر ایتیش اۉرینلی دېب حسابلهگنیمده، “یۉق” دېب جواب بېرگن بۉلردیم. بعضاً قوروقلیکدهگی عملیات ضرور بۉلهدی، اما بونی بیزنینگ اۉرنیمیزگه بجرهدیگن باشقه کوچلر هم بار.»
ترامپ آلدین هم ایرانگه قرشی قوروقلیکدهگی اوروش اوچون واسطهچی کوچلردن فایدهلنیش احتمالی حقیده گپیرگن اېدی.
اونینگ ادعاسیگه کۉره، امریکا عراق کردستانی حدودیده جایلشگن کرد جنگچیلرینی قوراللنتیرگن و اولرنی ایران چېگرهلریگه کیریب، ایران حکومتیگه قرشی جنگ قیلیشگه تیارلهگن.
