امریکادهگی محکمه۷۵ دولت فقرالریگه «مهاجرتی ویزه بېریشنی تعقیقلش»نی بېکار قیلگنیدن سۉنگ، «افغانایواک» تشکیلاتی افغانستانلیک عریضهچیلرنینگ قبول قیلیش بۉییچه ایشلرینی کۉریب چیقیش جریانینی قَیته باشلشگه چقیردی.
«افغانایواک» تشکیلاتی باشلیغی شان وندایور شنبه کونی (۳۱اسد) بیانات اعلان قیلیب، امریکا حکومتیدن مخصوص مهاجرتی ویزه طلبگارلری نینگ ایشلرینی قَیته کۉریب چیقیشنی باشلشنی سۉرهدی.
او امریکا تشقی ایشلر وزیری انیق ترتیب ایشلب چیقیب، محکمه تامانیدن قَیتریلگن ایشلرنی قَیته کۉریب چیقیشنی طلب قیلدی.
«افغانایواک» شونینگدېک، امریکا اوردوسی و تشکیلاتلرینینگ اوّلگی همکارلری آرهسیده ایلگری ویزه آلگنلرنی استثنالر رۉیخطیگه کیریتیشنی سۉرهدی. بو اولرگه امریکا توپراغیگه کیریش امکانینی بېرهدی.
مذکور تشکیلات کانگرسدن هم افغانستاندهگی امریکانینگ سابق همکارلری و امریکاگه کیریشنی کوتهیاتگن اولرنینگ عایله اعضالری بیلن باغلیق ایشلرنی کۉریب چیقیشنی یکونلشنی سۉرهدی.
بو آرهده امریکا اوردوسی و تشکیلاتلری نینگ مینگلب سابق همکارلری همده اولر نینگ عایله اعضالری امریکا تشقی ایشلر وزیری نینگ ینگی سیاستی طفیلی ناانیق وضعیتده قالگن.
طالبان نینگ قصاصیدن قۉرقیب، مملکتنی ترک اېتیشگه مجبور بۉلگن بو انسانلر نینگ اَیریملری منطقه دولتلریده، باشقهلری اېسه افغانستان ایچیده قۉرقوو آستیده یشهماقده. اولر امریکادن باشپناه آلیش اوچون مخصوص مهاجرتی ویزه آلیشگه عریضه تاپشیرگن.
امریکا تشقی ایشلر وزیرلیگی ۲۰۲۶-ییل ۱-جنوریدن کوچگه کیریتگن سیاستگه کۉره، 75 دولت، جملهدن افغانستان فقرالری نینگ مهاجرتی ویزهلر بیلن امریکا حدودیگه کیریشی تعقیقلندی. بو سیاست امریکا اوردوسی نینگ سابق همکارلریگه هم تأثیر کۉرستدی.
اما یقینده فدرال محکمه اوشبو تعقیق نینگ قانوني اساسی یۉقلیگی و اونی بېکار قیلیش کېرهکلیگی حقیده قرار چیقردی.
نیویارک جَنوبي بۉلگهسی فدرال محکمهسی قاضیسی ژانت وارگاس جمعه کونی (۳۰اسد) دونالد ترامپ حکومتی تامانیدن ۷۵ دولت فقرالریگه مهاجرتی ویزهلر بېریلیشینی تۉختهتیش سیاستینی «حقیقي اېمس و ناقانوني» دېب اعلان قیلدی.
محکمه ژانت وارگاسنینگ ایتیشیچه، تشقی ایشلر وزیرلیگیده آدملرنینگ ملتیگه اساسلنگن بوندهی عمومي تعقیقنی جاري اېتیش اوچون «ضرور قانوني صلاحیت» بۉلمهگن.
محکمه، شونینگدېک، امریکا مهاجرت قانونی ویزهلرنی ملتگه اساسلنگن حالده کمسیتووچی طرزده بېریشنی تعقیقلشینی و هر بیر عریضهچی نینگ ویزه آلیشگه لایقلیگی حقیدهگی قرار قنسوللیک خادیمی تامانیدن علیحده ترتیبده قبول قیلینیشی کېرهکلیگینی تأکیدلهگن
