هرات شهرینینگ جبرییل منطقهسیدهگی منبعلرگه کۉره، بیر شخص اوشبو منطقه مرکزینینگ اَیریم قِسملریگه اېگهلیک قیلیشینی دعوا قیلگنیدن سۉنگ، طالبلر قریب ۱۰۰ ته دوکاننی یاپگن. منبعلرنینگ ایتیشیچه، اوشبو ملک دعواسی بیلن باغلیق حالده طالبلر اوچ کیشینی هم حبسگه آلگن.
منبعلردن بیری یاپیق جبرییل بازاری دوکانلری کېچه، شنبه کونی، ۱۴سنبله کونی یاپیلگنینی و حاضرگچه فعالیت یوریتمهیاتگنینی ایتدی.
منبعلر دوکانلرنینگ یاپیلیشیگه اوشبو منطقهدهگی یېرلرنینگ اېگهلیگی بۉییچه کېلیب چیققن نزاع سبب بۉلگنینی بیلدیرماقده.
بیر منبعگه کۉره، یقینده «سید حبیب» اسملی شخص جبرییل شهرچهسی مرکزینینگ اَیریم قِسملریگه اېگهلیک قیلیشینی دعوا قیلگن.
منبع نینگ ایتیشیچه، سید حبیب هرات نینگ سابق واليسی سید حسین انورينینگ یقینلریدن بیریدیر.
منبعنینگ قۉشیمچه قیلیشیچه، بو شخص جبرییل مرکزیدهگی، جملهدن، گوجوم بازار جایلشگن حدوددهگی قریب ۵۰جېریب یېرگه اېگهلیک قیلیشینی دعوا قیلماقده.
منبعگه کۉره، دعواگرلر یقینده طالبلر وکیللری بیلن حدودگه کېلگن. محلي اهالی اولردن یېرگه اېگهلیک قیلیش بۉییچه حجتلرنی سۉرهگن، بیراق طالبلرنینگ ۱۳ناحیه بۉلیمی جبرییل اهالیسیدن اوچ کیشینی حبسگه آلگن.
منبع حبسگه آلینگن شخصلرنینگ اسملرینی «محمد حسین حسینی»، «حاجی دیدار» و «صالحي» دېب معلوم قیلدی.
منبعلرنینگ ایتیشیچه، بو شخصلر اۉتگن هفتهدن بېری حبسده سهقلنماقده.
اوشبو دعواگه عاید انیق معلوماتلر حاضرچه موجود اېمس.
طالبلرنینگ هراتدهگی محلي رسميلری هم حاضرگچه بو مسأله یوزهسیدن ایضاح بېرمهگن
