بو ییل ۲۹میزان، اۉزبېک تیلی ملی کونی، اۉزبېک خلقی تامانیدن کېنگ و ایلیق کوتیب آلینیب، خلقی‌میز کتّه قیزیقیش بیلن تیل بیره‌مینی نشانله‌دیلر. اۉزبېک تی‌وی اېسه بو قیزیقیشنی کمیده بیر هفته‌لیک مخصوص یایین بیلن یاریتیشگه حرکت قیلدی.
اۉزبېک تی‌وی تامانیدن قید اېتیلگن رقم اساسیده، اۉتگن ایکّی هفته دوامیده کمیده ۵۴ ییغین، تدبیر و کنفرانس آرقه‌لی اۉزبېک تیلی ملی کونی نه فقط افغانستان ایچکریسیده بلکه دنیانینگ تورلی مملکتلری و شهرلریده نشانلنگن.
طالبان اېسه بدخشان، بغلان و بلخ ولایتلری همده فاریاب‌نینگ شیرین‌تگاب و المار اولسواللیکلریده و قندوزنینگ امام صاحب اولسواللیگیده اۉزبېک تیلی ملی کونی نشانلنیشیگه توسقینلیک قیلدی و بو یېرلرده، تیارلیک آلینگن ییغینلر، طالبان باسیمی سبب مجبوری بیکار قیلیندی.
افغانستان‌نینگ تورلی ولایتلریده اهالی، مدنیت فعاللری و یاشلر شکوهلی ییغینلر و مراسملرنی تشکیل اېتیب، اۉزبېک تیلی ملی کونینی نشانله‌دیلر.
افغانستان ایچکریسیده، پایتخت کابل‌دن تشقری، فاریاب‌نینگ مرکزی میمنه شهری، اندخوی، خواجه‌سبزپوش و قیصار اولسواللیکلریده، سرپل‌نینگ مرکزی و سنچارک‌نینگ تبر و دوتم قیشلاقلریده علیحده ایکّی احتفال، جوزجان‌نینگ مرکزی شبرغان شهری، درزاب و آقچه اولسواللیکلریده، تخارنینگ مرکزی تالقان شهری و خواجه‌غار اولسواللیگی‌نینگ هزارباغ قیشلاغیده، قندوز شهریده و بغلان‌نینگ بورکه اولسواللیگی بالغچی قیشلاغیده خلق تامانیدن محفللر و ییغینلر اۉتکزیلیب، تیل بیره‌می نشانلندی.
اۉزبېک تیلی ملی کونینی نشانلش افغانستان چېگره‌لری بیلن چېکلنیب قالمه‌دی. تورلی مملکتلرده استقامت قیله‌یاتگن اۉزبېکلر هم اوشبو مناسبت بیلن بیر جایگه جمعلندیلر.
ایران‌ده تۉرت ته ییغین اۉتکزیلیب، اۉزبېک تیلی ملی کونی نشانلندی، امریکانینگ پنسلوانیا، فلوریدا، تگزاس و جورجیا ایالتلریده، انگلستان‌نینگ منچستر و لندن شهرلریده، تورکیه‌نینگ استانبول، قونیه و انقره شهرلریده، هالندنینگ اوکلند شهریده، آلمان‌نینگ هامبورگ شهریده، سویس‌نینگ زوریخ و برن شهرلریده، سعودی عربستان‌نینگ جده شهریده و پاکستان‌نینگ اسلام‌آباد شهریده، علیحده ییغینلر اۉتکزیلیب، اۉزبېک تیلی بیره‌می نشانلندی.
شونینگدېک، افغانستان‌دن تشقریده یشاوچی اۉزبېکلر و فعاللر اروپاده یشاوچی اۉزبېکلر کلتوری فدراسیونی تامانیدن زووم آرقه‌لی اۉتکزیلگن آنلاین کنفرانس و آینه میدیا پلتفورمی تامانیدن ایکس‌ده اۉتکزیلگن بحث‌ده اشتراک اېتیب، تیلگه عاید موضوعلر حقیده فکر المشتیردیلر.
افغانستانده بو ییل بیر قنچه خصوصی مکتبلر هم اۉزبېک تیلی ملی کونینی نشانلشده بیرینچی آدیملردن بۉلیب، تیل بیره‌مینی یخشی‌لب کوتیب آلدیلر.
فاریاب‌نینگ معروف ثمر، آیدین یولدزولر، رشاد، آق‌یۉل یقین، قمرسادات، ممتاز رجبی، ایرگش اوچقون، پیام، صدای قلم، عالم البیرونی، بیرلیک، طارق خطیبی، نخبگان و بیلیم یورتی خصوصی مکتبلری، جوزجان‌نینگ تورکستان خصوصی مکتبی و سمنگان‌نینگ مظفر و برهان دانش خصوصی مکتبلریده اۉزبېک تیلی ملی کونی مناسبتی بیلن مراسم اۉتکزیلیب، مکتب باله‌لری آنه تیللریده شعرلر و دکمله‌لر اۉقیب، مدنیتیمیزگه عاید نمایشلرنی اجر اېتدیلر.
اوشبو کوننی نشانلش مکتبلر و مدنی اویوشمه‌لر بیلن‌گینه چېکلنیب قالمه‌دی. سپورت اکادمیلریده هم دستورلر تشکیل اېتیلدی و سپورتچیلر سپورت مشغولاتلری بیلن بیر قطارده آنه تیلینی نشانلشده اشتراک اېتدیلر. سرپل‌نینگ فوتبال استدیونی همده فاریاب‌نینگ شاهی فوتبال اکادمیسی اوشبو مناسبت بیلن احتفاللرنینگ میزبانی اېدی.
تیل بیره‌م مناسبتی بیلن اۉتکزیلگن ییغینلرده، اۉزبېک مدنیتی فقط معروضه‌لر و شعرلر آرقه‌لی تنیشتیریلمه‌دی. بلکه ملی طعاملر، کییم-کېچکلر، کتابلر و مدنی بویوملر هم نمایش اېتیلدی.
مدنی احتفاللر بیلن بیر قطارده، کتابلر هم بو ییلگی دستورلرده علیحده ا‌ۉرین اېگه‌لله‌دی.
اۉزبېک تیلی ملی کونی عرفه‌سیده، دوکتور عزیزالله ارال «تیل آنگی» کتابی، تیل و ادبیات شیدالریگه تقدیم اېتیلدی. شونینگدېک، سویس‌نینگ زوریخ شهریده افغانستانلیک تورکلر مدنی اویوشمه‌سی (ساتما) تشبثی بیلن اۉتکزیلگن علمی-ادبی ییغین‌ده آلتی عنوان کتاب تنیشتیریلدی.
اوشبو اثرلر، شفیقه یارقین‌نینگ«اۉی‌لر شاده‌سی» عنوانلی علمی-ادبی مقاله‌لری تۉپلمی، محمدحلیم یارقین‌نینگ «فولکلور خزینه‌سیدن» عنوانلی مقاله‌لر ییغمه‌سی و پروفیسور بسم‌الله توردیقل میمنگی جنابلری‌نینگ «کیسکین قلم» عنوانلی مقاله‌لر تۉپلمی، شعریت عالمیگه عاید کتابلر هم شفیقه یارقین‌نینگ «جیم‌لیک شاوقینی» شعرلر تۉپلمی و محمدامین متین اندخویی‌نینگ «معنالر باغی» اۉزبېکچه شعرلری کلیاتی اېدی. شونینگدېک، پروفیسور عبدالحکیم شرعی جوزجانی‌نینگ «امام بخاری و زمان ماجرالری» عنوانلی کتابیدن عبارت دیر.
افغانستان اۉزبېکلری توسیقلیکلرگه تَن بېرمه‌ی تیللرینی شونده‌ی کېنگ و طنطنه‌لی نشانلر اېکن، بو حرکتلر نه‌فقط فرهنگی اهمیتگه اېگه اېکنلیگی بلکه اۉزبېک خلقی‌نینگ سیاسی و اجتماعی تاثیرینی آشیریشگه هم مهم رۉل اۉینه‌شی تاکیدلنماقده.
