«وال استریت ژورنال» خبریگه کۉره، امریکا قۉشمه ایالتلرینینگ جمهور رییسی دونالد ترامپ سعودي عربستان بیلن توزیلهدیگن هستهای کېلیشووی لایحهسینی معقولهگن.
«وال استریت ژورنال» بوگون (چهارشنبه، ۳۱-سرطان) امریکا رسميلریگه تهیهنیب یازیشیچه، امریکا و سعودي عربستان اۉرتهسیدهگی هستهای کېلیشووی۳۰ ییل مدتگه و اۉنلب میلیارد دالر قیمتیده بۉلیشی رېجهلشتیریلگن.
امریکا رسميلرینینگ تأکیدلشیچه، سعودي عربستاننینگ هستهای دستوری فقط تینچ مقصدلرده فایدهلنیلهدی.
حساباتگه کۉره، کېلیشوو امریکا کمپنیلریگه سعودي عربستاننینگ هستهای آستقورمهلرینی رواجلنتیریشده اساسي رۉل بېریلهدیگن طرزده ایشلب چیقیلگن.
کېلیشوونینگ مهم بندلریدن بیری – اگر واشنگتن و ریاضنینگ قۉشمه بهالشی بونی اساسلی دېب تاپسه، امریکا شرکتلری تامانیدن سعودي عربستانده یورانیومنی باییتیش فابریکهنی قوریش حسابلنهدی.
منبعلرگه کۉره، اوشبو کېلیشوو امریکاگه سعودي عربستاننینگ هستهای دستورینی نظارت قیلیش و مملکت نینگ هستهای قورالیگه اېگه بۉلیشینینگ آلدینی آلیش وکالتینی بېرهدی.
کېلیشوو لایحهسی یقین کونلرده کۉریب چیقیش اوچون امریکا کانگرسیگه یوباریلیشی رېجهلشتیریلگن. اگر تصدیقلنسه، آق اوی اونی سعودي عربستان بیلن رسماً امضالشی ممکن بۉلهدی.
«وال استریت ژورنال» یازیشیچه، کېلیشوو یقین شرقده هستهای صلاحیتی نینگ کېنگهییشیدن خواطر بیلدیرهیاتگن اَیریم قانونچیلر قرشیلیگیگه اوچرهشی کوتیلماقده .
امریکا و سعودي عربستان اۉرتهسیدهگی هستهای دستوری بۉییچه مذاکرهلر بیر نېچه ییلدن بېری دوام اېتماقده. امریکانینگ سابق جمهور رییسی جوبایدین بوندهی کېلیشوونی سعوديه عربستانی نینگ اسرایل بیلن مناسبتلرنی نارمهللشتیریشیگه باغلگن اېدی. بیراق دانهلد ترامپ آق اویگه قَیتگچ، بو شرطنی بېکار قیلگن.
سعودي عربستان ولیعهد شهزادهسی محمد بن سَلمان ۲۰۲۵-ییل می آییده دونالد ترامپ نینگ ریاضگه تشریفی چاغیده امریکا بیلن هستهای ساحهسیدهگی همکارلیک مسألهسینی کۉترگن. بیر نېچه آی اۉتیب، واشنگتنگه تشریفی دوامیده اوشبو کېلیشوونینگ تخنیکي جهتلری بۉییچه مذاکرهلرنی باشلشگه اېریشگن.
