غزه‌ده اسراییل و حماس گروهی آره‌سیده باشلنگن اوروش، یوز کون‌دن آشدی و بو اوروش تۉخته‌لیشی و اوزون مدت‌لی آتیش-کېسین برقرار اېتیلیشی بۉېیچه بۉلگن دنیا بۉیلب اېسته‌ک‌لر و سعی و حرکتلر حاضرگچه ایجابی نتیجه بېرمه‌گن و شونینگدېک، بو خصوصده بیرلشکن ملت‌لر تشکیلاتی‌گه تکلیف اېتیلگن قطعنامه هم رد اېتیلدی.
غزه اوروشی دوام اېتیب کېلگن بیرحالده بو یازووده، اوروش نېگه کۉپ دوام اېته‌یاتکنی‌نینگ سبب‌لری، مذکور اوروش باعث منطقه‌ده تۉغیلیشی ممکن بۉلگن باشقه اوروشلر و تارتیشوولر و شونینگدېک دنیاده، اینیقسه یقین شرق‌ده‌گی اوروشلر و تارتیشوولرنی افغانستان اوستیده قالدیرگن، عاقبت‌لری توغریسیده نظر تشلَنگن.
غزه‌ده‌گی اوروش و تارتیشوولرنینگ ینگی تفصیلات‌لری
غزه‌ده باشلنگن اوروش، بوکون سه‌شنبه، 26 – جدی، 102 – کونی‌گه کیریب کېلدی و بو قانلی و یکونی بیللی بۉلمه‌گن تارتیشوو، اۉتکن میلادی ییل‌نینگ 7 – اکتبر کونی فلسطین‌لیک قورالی حماس گروهی‌نینگ اسراییل جنوبیده‌گی هجومی و بو قورالی گروهی تامانیدن کمیده 1200 کیشی‌نینگ قۉلگه آلینیشی آرتیدن باشلندی و مذکور اوروش حاضرگه قدر قچان یکون‌لنیشی بیللی بۉلمه‌گن بیرحالده، دوام اېتیب کېلماقده.
فلسطین ساغلیق‌نی سقلَش وزیرلیگی تامانیدن ترقه‌تیلگن معلومات‌لرگه اساس، اسراییل و حماس آره‌سیده‌گی یوز کون‌لیک اوروش، عاقبتیده کمیده 24 مینگ فلسطین‌لیک اۉلیب و باشقه 60 مینگ‌دن کۉپراق انسان یره‌لنگن و بو قربان‌لر رقمی اوروش دوامی باعث، کونسایین کۉپه‌یشی ممکن.
سۉنگی کون‌لرده، اسراییل و حماس گروهی آره‌سیده‌گی اوروش تۉخته‌تیلیشی بۉییچه بیرقنچه شهرلر اینیقسه امریکا و بویوک بریتانیاده، ناراضلیک نمایش‌لر یۉلگه قوییلدی، بیراق شنبه کونی 22 – جدی، نطق سۉزله‌گن اسراییل باش وزیری بنیامین نتنیاهو، اوروش‌نی دوام اېتیریشی و بو خصوصده هیچ کیم‌نی طلبی‌گه قولاق سالمس‌لیگینی بیلدیردی.
گزارش‌لرگه کۉره، حاضرگه قدر اوروش‌نی آلغه آلیب باریلیشی بۉییچه اسراییل‌نی قوللب_قوتلب تورگن امریکا قۉشمه ایالت‌لری، اینیقسه جمهور باشلیغ جوبایدن بو خصوصده اسراییل باش وزیری‌نینگ قیلمیش‌لریدن انچه ناراض‌لشگن.
دیمک ایشانچ‌لرگه کۉره، اسراییل و حماس آره‌سیده‌گی تارتیشوولر دوامی منطقه‌ده‌گی ناتینچ‌لیک دایره‌سی کېنگه‌یتیریلیشی و ینگی تۉسیق‌لیک‌لرنی اۉرته‌گه آلیب کېلیشی ممکن.
غزه اوروشی نېگه کۉپ دوام اېتماقده؟
غزه‌ده‌گی اوروش کوتیلمه‌گن حالده اوزاققه چوزیلیب و بو اوروش هیچ بۉلمه‌گنده وقتینچه‌لیک تۉخته‌تیلیب، انسان‌پرورلیک یاردم‌لر ېیتکزیلیشی اوچون آتیش-کېسین برقرارلنیشی مقصدده، بیر قنچه قطعنامه‌لر بیرلشکن ملت‌لر تشکیلاتی نینگ خوفسیزلیک کېنگشی‌گه تصدیق‌لنمه‌دی و نهایتده قویاش جاری ییل جدی آیی باشلنیشی بیلن انسان‌پرولیک یاردم‌لر غزه‌ده ېیتکزیلیشی توغریسیده قوله‌یلیک یره‌تیلیشی مقصدده بیر قطعنامه تصدیق‌لندی، بیراق بو قطعنامه‌گه آتیش_کېسین برقرار اېتیلیشی اوچون هیچ قنده‌ی قرار آلینمه‌گن اېدی.
دیمک، غزه اوروشی کۉپ دوام سورگنی‌گه بیر قنچه سبب‌لر بارلیگی اَیتیله‌دی. بیرینچی سبب بو اوروش‌گه نقطه قوییلشی اوچون دنیا بۉیلب بیر کېلیشوو یۉق‌لیگی دیر و دنیا مملکت‌لری اینیقسه نفوذلی و بویوک کوچ‌لرنی آره‌سیده‌گی جنجل‌لر و تارتیشوولر مذکور اوروش‌گه نقطه قوییلیشی خصوصیده‌گی سعی‌وحرکت‌لرگه سلبی تاثیر قویگن و بو خصوصده بیرلشکن ملت‌لر تشکیلاتی‌نینگ خوفسیزلیک کینگشی‌ده بۉلیب اۉتکن بحث‌لر و آتیش-کېسین اوچون بۉلگن قطعنامه‌لرگه رد آوازلر بیریلیشی‌گه اشاره قیلیش ممکن.
اوروش دوامی‌گه ایکینچی سبب هم، اسراییل حکومتی‌نینگ اوروش نی دوام بېریشی‌گه جدی‌لیگی دېب اَیتیله‌دی و اسراییل طلب‌لرگه قرشی حاضرگه قدر اوروش‌نی دوام بېریشی‌نی اۉرغوله‌گن.
غزه اوروشی‌نینگ دوامی نیمه‌لرگه سبب بۉلیشی کوتیله‌دی؟
غزه اوروشی، روسیه‌نینگ اوکراین‌گه قرشی حربی هجومی باشلنگنیدن بیر یریم ییل‌دن کۉپراق زمان اۉتکن‌دن کېین و بو اوروش بیر نتیجه‌گه ایریشمسدن، باشلندی و سیاسی همده خوفسیزلیک ایریم ایشانچ‌لر بو ایکی بویوک اوروش بیر بیراولریگه باغلیق بۉلگنی‌نی معلوم قیله‌دی.
بو ایشانچ‌لرنی مدعی‌سیگه کۉره، روسیه منطقه‌ده‌گی ایران کبی شریک‌لری آرقه‌لی غربی رقیب‌لری، اینیقسه امریکاگه قرشی ینگی بیر جبهه قوریش مقصدده غزه‌ده‌گی اوروش‌نی اۉرته‌گه کېلیشی‌گه حصه آلگن. نیمه بولسه هم حاضر دنیانینگ کیله‌جکده‌گی تینچ‌لیگی، حاضر بو ایکی بویوک اوروش‌گه باغله‌نیب قالگن و خلق‌ارا خوفسیزلیک کیله‌جگی نیمه بۉلیشی توغریسیده‌گی قره‌شلر، بو اوروش‌لرگه تېکیلگن.
بو ایشانچ‌لرنی نظرگه توتکن حالده، غزه اوروشی بیرازگینه بۉلسه هم روسیه و اوکراین آره‌سیده‌گی اوروش‌دن کېلیب چیققن و غزه اوروشی‌نینگ دوامی بیر قنچه باشقه اوروش‌لرنی منطقه‌ده اینیقسه یقین شرققه اۉرته‌گه آلیب کېلیشی ممکن.
بو ادعانی شو ییردن چیقاریب اَیته آله‌میز که حاضر بیر نېچه کون‌دن بویان قیزیل دېنگیزده هم بیراز تارتیشوولر اۉرته‌گه کېلگن و اۉتکن جمعه کون‌دن باشلب، امریکا و بریتانیا هوایی حربی‌لری، یمن‌لیک حوثی‌لرگه قرشی حربی عملیات‌لرنی یۉلگه قوییب، حوثی‌لرگه تېگیشلی مرکزلرنی نشان آلگن.
یمن‌لیک قوراللی حوثی‌لر غزه‌ده‌گی اسراییل‌نینگ هجوم‌لری آرتیده امریکا قۉشمه ایالت‌لری و بریتانیا بارلیگی اوستیگه اۉرغولب، شو باعث بو ایکی مملکت‌گه قرشی اوروش و دشمن‌لیککه دوام بېریش‌نی بیلدیرگن. شو سبب قیزیل دېنگیزده‌گی ینگی اوروشلر غزه تارتیشوولریدن کېلیب چیققن‌لیگی بیلینه‌دی.
بونگه قۉشیمچه، غزه‌ده‌گی اوروش دوامی لبنان‌لیک «حزب‌الله» کبی باشقه قورالی گروه‌لر و تامان‌لرنینگ جدی اَره‌لشیشی و نهایتده اوروش دایره‌سی کېنگه‌یشی خصوصیده هم خواطرلر موجود.
اَیتیش کېره‌ک، غزه و اوکراین اوروشی دنیا بۉیلب اقتصادیات همده مهاجرلیک بولیم‌لریده جدی تأثیر قویگن و تخمین‌لرگه کۉره، غزه اطرافیده‌گی مملکت‌لر اقتصادیات وضعیتی، اوروش باعث سلبی تاثیرلر بیلن یوزمه‌یوز بۉله‌دی و شونینگدېک اوکراین و غزه اوروشی باشلنگنیدن بویان مهاجرلیک رقمی کۉپه‌یگن.
دنیاده‌گی اوروش‌لرنی افغانستان اوستیده‌گی تأثیری
غزه و اوکراین اوروشی دوام اېتیب کېلگن بیرحالده، افغانستان ایکی ییل‌دن آشه‌راق زمان‌دن بویان اۉرته‌گه کېلگن سیاسی اۉزگریش طفیلی، خلق‌ارا هم‌جمعیتی تامانیدن رسمیت‌گه تانیلمه‌گن بیر حکومت تامانیدن باشقیریلیب کېلماقده و غزه و اوکراین اۉروشی کبی دنیانینگ باشقه بۉلیم‌لریده‌گی توجه‌سی، افغانستان سیاسی انزواسی‌نینگ دوامی‌گه و دنیانینگ افغانستان اوچون بۉلگن توجه‌لری کمه‌یشی‌گه سبب بۉلگن و نهایتده افغانستان حاضر سیاسی انزوا همده رسمی بیر حکومتی یۉق‌لیگی باعث، کۉپراق اقتصادی و سیاسی قیینچیلیک‌لرگه یوز بۉلیشی ممکن.
