قندهاردهگی منبعلرنینگ ایتیشیچه، طالبان کوچلری و پاکستان حربيلری اۉرتهسیدهگی تۉقنشووده تۉرت کیشی تینچ اهالی و ایکّی طالبدن عبارت جمعی آلتی کیشی هلاک بۉلگن، ینه تۉرت کیشی یرهلنگن.
منبعلرگه کۉره، تۉقنشوو جمعهدن شنبهگه اۉتر کېچهسی ساعت ۱۰ ده ( جمعه ۱۴ قوس) ویشُ مزلگل و لقمان قیشلاقلریده یوز بېرگن.
طالبان ایچیدهگی بیر منبعنینگ ایتیشیچه، پاکستان حربيلرینینگ هاوان اۉقی تۉرتته تینچ اهالینینگ اۉلیمیگه سبب بۉلگن و ینه تۉرت کیشی یرهلنگن. باشقه منبعلر ایکّی طالب نینگ اۉلدیریلگنینی تصدیقلهگن.
منبعگه کۉره، یرهلنگنلر آرهسیدهگی بیر عیال و بیر اېرکک نینگ احوالی آغیر بۉلیب، اولر عینِ پیتده عینو مینه شفاخانهسیده دوالنماقده.
بو آتیشمه سپین بولدک اهالیسیگه کتّه مادّي ضرر یېتکزگن دېدی منبعلر.
طالبان اعضالری پاکستان حربيلری کوتیلمهگنده اولرنینگ تامانیگه نارنجک آتگنینی، شوندن کېین جنگ باشلنگنی حقیده خبر بېرگن.
منبعلرنینگ تأکیدلشیچه، ساعت بیردن کېین ایکّی تامان کېلیشووگه اېریشگن و جنگ تۉختهتیلگن.
طالبان سۉزلاوچیسی ذبیحالله مجاهد هم کېچه پاکستاننینگ قندهارنینگ سپین بولدک اولسواللیگیده هجوم قیلگنینی ایتیب، طالبان کوچلری هم جواب قَیترگنینی بیلدیرگن.
پاکستان رسميلری اېسه بو بارهده حلی ایضاح بېرمهگن.
طالبان و پاکستان بوندن قریب ایکّی آی آلدین هم تۉقنشگن اېدی. بیر هفتهلیک جنگلردن سۉنگ اۉت آچیشنی تۉختهتیش حقیده کېلیشوو بۉلگن، اما دوام اېتگن مذاکرهلر نتیجه بېرمهگن.
ینگی تۉقنشوو اېسه یقینده سعوديه عربستانی ریاضده طالبان و پاکستان مذاکرهلریگه مېزبانلیک قیلگنی، و ایکّی تامان اۉت آچیشنی دوام اېتتیریشگه راضی بۉلگنی حقیدهگی خبرلر چاغیده صادر بۉلدی.
