بیرلشگن ملتلر تشکیلاتینینگ انسانپرورلیک مسألهلرنی موافقلشتیریش ادارهسی (اوچا) زودلیک بیلن قۉشیمچه مبلغ اجرهتیلمسه، افغانستانده میلیونلب انسانلر حیاتنی سقلب قالووچی طبي خدمتلردن محروم بۉلیشی ممکنلیگی حقیده آگاهلنتیردی.
اوچا بوگون (یکشنبه،۴ اسد) ایکس اجتماعي ترماغیده نشر قیلگن بیاناتیده افغانستاندهگی انسانپرورلیک لایحهلرنی مالی قۉللب-قوّتلشگه چقیردی.
تشکیلات نینگ معلوم قیلیشیچه، مبلغلرنینگ قیسقریشی سببلی ۲۰۲۶ییلده۵.۷ میلیون باله و آنهگه مۉلجللنگن آزیقلنتیریش دستورلری خوف آستیده قالماقده.
اوچا هر بیر باله ساغلام و بهه قوّت اولغهییش امکانیتیگه مناسب اېکنینی تأکیدلهدی.
مذکور آگاهلنتیریش افغانستانده آزغینلیک (تۉییب آوقتلنمسلیک) موسمینینگ اېنگ آغیر دوری باشلنیشی بیلن بیر وقتده اعلان قیلیندی.
ایکّی هفته آلدین بیرلشگن ملتلر تشکیلاتینینگ بالهلر جمغرمهسی (یونیسف) هم آزیق-طعام خوفسیزلیگی یامانلشیب بارهیاتگنی و آزغینلیک موسمی یقینلشهیاتگنی سببلی۳.۷میلیون افغانستانلیک باله تۉییب طعاملنمسلیک خوفی آستیده قالهیاتگنینی معلوم قیلگن اېدی.
جاري ییل دوامیده بیرلشگن ملتلر تشکیلاتیگه قرهشلی تشکیلاتلر مبلغلرنینگ کمهییشی همده افغانستانده، اینیقسه آنهلر و بالهلر اۉرتهسیده قشّاقلیک و ساغلیقنی سقلش بیلن باغلیق وضعیت یامانلشهیاتگنیدن بیر نېچه بار خواطر بیلدیرگن.
بیرلشگن ملتلر تشکیلاتی حساب-کتابلریگه کۉره، ۲۰۲۶-ییلده افغانستانده قریب۲۲ میلیون کیشی انسانپرورلیک یاردمگه محتاج.
مذکور احتیاجلرنی قاپلش اوچون بیرلشگن ملتلر تشکیلاتی 1،71 میلیارد امریکا دالری مقداریده مبلغ سۉرهگن. بیراق ییل نینگ بیرینچی یرمیده اوشبو مبلغنینگ اتیگی۱۶ فایزی مالیهلشتیریلگن.
