سمنگان‌نینگ تاغلری آره‌سیده جایله‌شگن حضرت سلطان اولسواللیگینینگ قیشلاقلریدن بیری «کۉکجر» بوگون جیم-جیرت و ویران؛ چونکه سونگی زلزله باشقه بو کبی کۉپلب قیشلاقلردیک بو ییرده هم بیر لحظه‌ده کۉپلب انسانلر اوچون قیامت یره‌تدی.
اۉتگن یکشنبه کېچه‌سی اویقوده تینچ آلیب یاتکن بیر پیتده ییر سیلکیب، آدملرنی نه‌فقط تینچ حالینی بوزدی بلکه اولرنینگ ییللر ایلگری آغیر محنت قیلیب، قۉللری بیلن قورگن اوی‌لری بیر لحظه‌ده توپراققه اَیلندی. بیر نیچه کون ایلگری اهالی اوچون سرپناه بۉلگن اۉنلب اوی‌لرگه باش اۉریب کۉرگنینگیزده وو ییرده فقط قوله‌ب توشگن دیوارلر و سینیق غیشت‌لرنی کۉره‌سیز.
زلزله عاقبتیده باش پناه‌لرینی قۉلدن بېرگن کۉکجرلیکلرنینگ ویرانه‌گه اَیلنگن اوی‌لریده زلزله‌دن کېین آغیر تشویش حُکم سورماقده؛ ییقیلگن دیوارلری آره‌سیده سیکین‌لیک بیلن قدم تشلب کېله‌جکدن خواطرده بۉلگن کۉکجرلیک ایرکک‌نی کۉزی ییقیلگن دیوارلرگه تیکیلگن. باله‌لری اوچون باش پناه بۉلگن بو دیوارلر چوکیشی‌دن کېین «ایندی اولر قیسی احوالده قاله‌دی اېکن» دېگن تشویش‌نی یورهگیدن چیقریب آه تارته‌دی.
اهالی معلوماتی‌گه کۉره، لوپان نو کۉکجر، قزلباش کۉکجر و مالکار کۉکجردن عبارت بۉلگن کۉکجر حدودیده کمیده ۲۲ اوی زلزله نتیجه‌سیده ویران بۉلگن و اهالی حاضر باش پناه‌سیز دیر.
اوشبو قیشلاق اهالیسی، ساووق هواده احواللری آغیرلیگیدن اېسلب، تیزلیک بیلن اولرگه یاردم کۉرسه‌تیلیشینی کوتماقده. ایتیشلریچه یاردم بیرووچی تشکیلاتلر خادملری کېلیب احواللرینی تیکشیریب کېتگن، بیراق حاضرگچه اولرگه یاردم ییتکزیلمه‌گن.
