امریکا و ایران اۉرتهسیده قیته باشلنگن اوروش و تۉقنهشوو تۉلقینی بیر هفتهگه تۉلدی و بو مدت ایچیده، ایکّی تامان هم کېتمه-کېت هجوملرینی دوام اېتتریب کېلماقده دیر.
اوشبو اوروش و تۉقنهشوو، ایران و امریکا اۉرتهسیدهگی اوروشنی تۉختهتیش مقصدیده، پاکستان واسطهچیلیگی بیلن اۉرتهگه کېلگن کېلیشوو سبب بیرازگینه تنفس بیلن قیته باشلنگن بۉلسه-ده بیراق ایلگری تۉقنهشوولرگه قرهگنده بو مرته اوروش بیر قنچه فرقلی کۉرینیشده باشلنگن.
بو مرته ایران و امریکا اۉرتهسیدهگی اوروشده حاضرگچه، اسراییل عملا قۉشیلگن اېمس و فقطگینه اوروش و تۉقنهشوو امریکا و ایران اۉرتهسیده دوام اېتماقده و ایشانچلرگه کۉره، بو امریکا تامانیدن باشقیریلگن حالده بۉلگن اوروش کۉرینیشی دیر.
بعضی-بیر یېتکیرمهلرده چیققن تحلیللرده، امریکا قۉشمه ایالتلری اسراییلنی اتهیلیب بو دور اوروشدن اوزاق توتگنی و بو بیلن امریکا، ایراننینگ اسراییلگه ضد اسلامی تبلیغاتلرینی باستیریب، باشقه اسلامی دولتلردهگی ایراننی قۉللب-قۉتلش فکرلرینی آزهیتریش مقصدیده قۉلگه آلینگنی ایتیلهدی.
شونینگدېک، بو دور اوروش و تۉقنهشوولرنینگ اساسی فرقلریدن بیری بو حاضر اوروشنینگ اساسی اعتباری «هرمز بۉغازی» اوستیدهگی حاکمیتگه قرهتیلگنی دیر. ایلگری امریکا و اسراییلنینگ قۉشمه هجوملریدن سۉنگ ایران، امریکا و شریکلریگه باسیم اۉتکزیش مقصدیده، هرمز بۉغازینی یاپیب قۉیدی و بو اېسه انرژی تامیناتیده جدّی باسیم اۉرتهگه آلیب کېلدی. حاضر اېسه اوشبو تجربهدن کېلیب چیققن حالده، امریکا، بو مرته ایراننینگ باسیم اۉتکزیش اوچون بۉلگن بو باسیم ابزارینی قۉلیدن آلیش مقصدیده اوروشنی باشلب دوام اېتتریب تورگنی کۉرینهدی.
اوروش تېزلیکده یکونلنهدیمی؟
کۉرینیشیچه، بو مرته ایران و امریکا اۉرتهسیدهگی تۉقنهشوولر فرقلیراق و جدّیراق باشلنگن بۉلیب، بیر هفتهدن بویان دوام اېتماقده دیر.
اوشبو بیر هفته ایچیده یوز بېرگن واقعه نه فقط اوروش تېزآرهده یکونلنمسلیگیدن خبر بېرماقده بلکه اوروش کېنگهییب کېتیشی احتمالی حقیده هم فکرلرنی اۉرتهگه آلیب کېلگن و شو سبب قۉییدهگی ایکّی اساسی دلیللر سبب اوروش دواملی بۉلیشی و کېنگهییشی ممکن دیر.
اۉرتهدهگی کېلیشماوچیلیکلر: یوقاریده اېسلب اۉتگنیمیزدیک بو مرته اوروش اساسا هرمز بۉغازینی باشقیریش اوچون باشلنگن و بو خصوصده بیران-بیر کېلیشوو ممکنلیگی حقیده هلی دستلبکی اینتیلیشلر هم موجود اېمس. بیر تاماندن امریکا هرمز بۉغازیده ایراننینگ تۉلیق حاکمیتیگه نقطه قۉییش اوچون حرکت قیلیش نیتده بۉلسه-ده باشقه بیر تاماندن ایران هیچ قچان بو قوتینی قۉلدن بېریشگه تیار اېمس. شوندهی اېکن هرمز بۉغازی مسالهسی مرکّب کېلیشماوچیلیکلرنی اۉرتهگه آلیب کېلگن و هلی-بیری حل اېتیلیشی هم ممکن اېمس. بوندن تشقری، هرمز بۉغازی مسالهسی حل اېتیلدی دېگنیمیزده هم ایراننینگ هستهای قورال مسالهسی و شونگه اۉخشش باشقه بیر قنچه موضوعلر بار که بو مسالهلر اوچون قولهیلیک بیلن امریکا و ایران اۉرتهسیده کېلیشوو بۉلیشی ممکنسیز دیر و اولر هم اوروش و تۉقنهشوولرنی دواملی قیلیشی ممکن دیر.
منطقهدهگی حرکتلر: سۉنگّی بیر هفته دوامیده یقین شرق حدودی ایران و امریکا اۉرتهسیدهگی تۉغریدن-تۉغری تۉقنهشوولردن تشقری باشقه بیر قنچه حرکتلر گواهی هم بۉلدی که بو حرکتلر هم ایران و امریکا اوروشی بیلن باغلیق اېکنی ممکن دیر. مثال اوچون بیر هفته ایچیده سعودی عربستاننینگ یمنگه قیلگن هجومی و بو هجومگه جوابا یمن حوثیلرینینگ سعودی عربستانگه اویوشتیرگن هجوملری همده لبنان حزباللهسیگه قرشی سوریه حرکتلری و بو مملکتدن اۉتهیاتگن حزبالله قوراللری قید اېتیلیشی شونی کۉرسهتدی که ایران و امریکا اۉرتهسیدهگی اوروش نهفقط تېزآرهده یکونلنیشی بېللی اېمس بلکه بو اوروش منطقهدهگی نزاعلرنی ینه-ده کوچهیتیریب، اوروش کېنگهیشی هم ممکن دیر.
خلاصه قیلیب اَیتگنده، ایران و امریکا اوروشی بو مرتهده جدّی و ینگی بیر کۉرینیشده باشلنیب کېنگهییب بارماقده و شوندهی اېکن بو اوروش و تۉقنهشوولر ینه-ده کېنگهییشی احتمالی کوچلیراق دیر.
عینی حالده، باشقه بیر نرسهنی هم اېسلش لازم که ایریم مملکتلر جملهدن پاکستان، امریکا و ایران اۉرتهسیده بیر کېلیشوو اۉرتهگه کېلیشی اوچون هم سعیوحرکتلرنی دوام اېتتیرماقده و بو حرکتلر قنچهلیک فعاللیک بیلن ایلگری کېتیب تامانلرنی قانیقتیریشگه قادر بۉلهدی زمان اۉتیشی بېللی قیلهدی.
